Sagaing ramthen, Kalay peng, Kalay-Tamu lamzinpi kap ih um Zohmun khua ih palik camp cu Kalay PDF pawl in lak sak in an camp meisa an ur sak thu theih a si.
Hi doawknak sungah kap hnih karlak thi le hlo an um men thei nan thu hla cipciar theih a si hrih lo. PDF lam cun ralhrang pawl ih ralthuam then khat an lak sak mi a um tiah tualsung mipawl in an sim.
“SAC ralhrang tirhfung pawl hi a tir ihsin an sual tuk. Mipi sumdawng le sumhawl pawl hnen in sumpai an dil ringring. An nin nak a rei tuk zo. Curuangah mipi pawl in PDF pawl hnenah in ra kah sak uh tin an dil reronak a rei zo. Khawsung mipawl cu a himnak lam ah an rak tlannak a rei zo” tiah Zohmun khawsung thu hla theitu pakhat in a sim.
Doawknak sungah SAC ralhrang tirhfung pawl an nat ruangah raldonak vanzam pahnih thawn a ra kah bawm tiah PDF sungtel pawl in an rel.
“Palik pawl an nat ruangah raldonak Helicpter Mi-35 thawn a ra kah bawm. Pakhat sawn tla cu a awn hman thei man lawn in ra bomb. PDF lam ihsin hriam tuar kan um nan tu cu a himnak lam ah kan ret theh zo. Ralhrang lam ihsin G-3, Ak, MA-4 le pistol mei thal kan lak sak. Palik camp khal meisa kan ur sak” tiah PDF sungtel pakhat in a sim.
Zohmun palik camp ih umtu pawl cun tualsung sumtuah tupawl hnen in, motor cycle pakhat ah thawng 20, caw pakhat tawl asile thawng 30 tivek in mipi sum tuah tupawl hnen ah an rak dil theu.
