Zomi Congress For Democracy (ZCD) party cun SAC ralhrang pawl ih timlamnak an neih rero mi rampi hrilawknak ah tel dingin Party sinak an dil thu March ni 25 ah ralhang pawl ih thuthangca ah an tarlang.
ZCD party hi kum upazet zo mi party si in, Tedim peng le Tongzang peng hram bun ih din mi party a si.
2010 rampi hrilawknak ah duh lonak an lang ter ruangah hrilawknak ah tel duh lo in, 2015 rampi hrilawknak ahcun Tedim, Tongzang pengih hlutdaw hmun tam sawn ah nehnak an co. Asinan 2020 rampi hrilawknak ah cun vote hmun pahnih lawngah nehnak an co.
ZCD party in party sinak an dil rero lai ah Chin National League for Democracy party cun SAC ralhrang pawl ih tuah dingmi hrilawknak ah kan tel ve lo ding tiah party sinak an dil tum lo thu March ni 22, ni thla thawn thu an then cat mi, mipi pawl theihternak an nei.
Chin ramkulh sungah Zomi Congress for Democracy hleiah, Chin Nation League For Democracy party, Khumi National Party, Ethnic Development Party, Zo Ethnic Development Party, Asho Chin National Party pawl an um ih tuini tiangah ZCD party lawng ralhrang pawl hnen ah party sinak diltu an si.
SAC ralhrang pawl cun ramkhel party pawl cu party sinak dil dingin an than rero nan hrilawknak an tuah ding ni cu fumfe in an thei hrih lo. Ramkhel thlir tu tampi cun tui ramsung buainak ruangah SAC ralhrang pawl in hrilawknak an tuah ding mi hi a cangsuak thei zik lo tiih a rak ruat tu khal tampi an um.
Myanmar rampi huap in party sinak diltu 52 an um ih, rampi huap ih a zuamtu ding party 12, Ramkulh le ramthen sung lawngih a zuamtu ding party 40 pawl in party sinak an dil tiah SAC election commissioner cun an tarlang.
