Sagaing ramthen, Kalay khawpi ih zaan bazar kai theu tupawl cu SAC ralhrang pawl in zaan vahsuah an kham ruangah eiin an hawlawknak lam ah harsatnak an ton thu bazar kaitu pawl in an sim.
SAC ralhrang pawl in thuneihnak an lak ihsin Kalay khawpi sungah zaan nazi 8 in zinglam nazi 6 tiang, zaan vahsuah an khamnak kum 2 lenglo a ti thlang. Khawsung mipi an hlunghlai zetnak hmun zaan barzar cu zing nazi 2 in zinglam nazi 6 tiang thil zuar theu a si ih, ralhrang pawl in thuneihnak an lakhnu in thil zuar le a leitu khal an mal tiah khawsung mipawl in an sim.
Hi zaan barzar ah hanghnah hangrah, Sa, nga, sarep phunphun le pangpar phunphun nitin hman tul mi thilri pawl an zuarnak hmun a si. SAC ralhrang pawl in zaan vahsuah an kham ruangah thlapang phah cingin an um nan innsung sang eiin hruakpuan tul samnak ruangah zaan bazar ah hna kan tuan thotho tiah kum 7 sung တို့ဟူး rak zuar tu pakhat in a sim.
A nih cun “တို့ဟူး ka zuarnak kum 7 lenglo a si zo. Puai ni khua a mal vivo tik ah တို့ဟူး zuarnak a mal vivo. Ram a that lai ahcun puai tete pawl ah in cah tu an um theu. Tu cu khawte lam ihsin in cahtu pawl hnen lawngah kan zuar thei” tiah a sim.
Kalay khawpi zaan bazar ih an zuar mi, a tam sawn cu khawpi sungah zaan bazar ah an khar ih, Kalay peng ih khawte pawl ah an zuar sawng sal theu. SAC ralhrang pawl in zaan vahsuah an kham hnu ihsin dutawk in thil zuar a theh nawn lo raungah inn suangsang eiin sinfen hrang harsatnak kan tong tiah zaan bazar ih kum 10 lenglo hnahring a rak zuartu nupi nu pakhat in a rel.
“kan nih cu တင်သား lam mi kan si tik ah Kalay thawn peng 40 hrawng a hla aw. Cuvek asi ruangah thilzuartu pawl cu hmun khat ah ko khawm aw in motor thawn kan feh khawm theu. Zinglam nazi 4 hranwgah kan tlung sal theu. Zaan vahsuah an kham ruangah hnatuannak hrang a rem cang lo zet. Thil ka zuar nawn lonak kum 2 lenglo a si thlang. Hlan lai pi ihsin hivek in cawmawknak hawl aw tu kan si ruangah tu ahcun hnatuan a theih nawn lo ih kan harsa tuk” tiah a sim.
Kalay tlanglam ih tualsung mipawl cu SAC ralhrang pawl ih zaan vahsuah an kham ruangah le tualsung kahawknak a um phahphah ruangah thilzuarnak an cawl theh. Thilri man a kai cu thu khat, thil zuar tik ah hlan vek in zalen zet in thilzuar a theih nawn lo ih kan harsa zet tiah hanghnah hangrah zuartu pawl khal in an sim.
Kalay khawsungah SAC ralhrang pawl le tualsung mipi ralkap karlak kahawknak nitin cun a suak lo nan an kahawk leuhleuhnak hmun a si.
