Sagaing ramthen, Tamu peng, ကွန်းတောင်း khua ih mipi ralkap tangrual pawl ih camp pakaht cu SAC ralhrang pawl in tuizing ah an siim ih, mipi ralkap pawl in khamawknak ih an rak kahsal ruangah doawknak a sosang sinsin, ralhrang lam an nat ruangah Helicopter thawn a ra kah bawm thu theih a si.
“ralhrang pawl in kan camp in ra kap. nau le pawl dungsip in an um lawk nan an va nor salnak ah ralhrang ruak 4 kan ngah. Thi le hnai thawn hriam ngahtu khal an tam” tiah Tamu mipi ralkap PDF sungtel pakhat in a sim.
Zinglam nazi 7 hrawngah SAC ralhrang paw in PDF camp va kap in le mipi ralkap pawl cu dung an sip. Cumi ihsin PDF pawl in an va dosalnak ihsin SAC ralhrang pawl lam in thi le hlo an um vek in mipi ralkap lam khal in ralkap pakhat thi in, minung 2 in hriam an ngah thu theih a si.
Ralhrang pawl an nat ruangah March ni 23 zaanlam nazi 2 hrawngah SAC ralhrang Helicopter pakhat in bomb a ra thla nan, zohman hriam ngah an um lo. Camp khal a langte suahsan lawk asi ih an va kahsalnak khal ah thi hlo an um nawn lo thu PDF pakhat in a sim.
Tuisun ih thu hla theih net vek asile SAC ralhrang pawl in vanzam an hman ruangah mipi pawl cu a himnak hmun lamih an tlan thu tualsung mipawl in an sim.
Tamu PDF B-1, B-2 pawl cu National Unity Government (NUG) humhimnak ih district battalion pakhat an si.
