Sagaing ramthen, Tamu peng mipi ralkap, PDF pahnih SAC ralhrang pawl ih an kaih ngah mi hnen in PDF midang pawl ih thu le hla thei cipciar thei dingih an a zuam thu theih a si.
PDF nunau pakhat le mipa pakhat pawl cu March ni 18 zinglam ah Tamu khawsung an va tlawn ttum ah PDF nunau pakhat ih Nu in mikhual cazin pe dingih a va fehnak ihsin an kaih mi asi tiah vengsung um tupawl in an rel.
“Ahlece in Tamu khawsung စန္ဒကူး veng sungih mipi pawl an him nawn lo. Nauhak timi cu vuak velhnak thawn thu an suh ahcun an sim ko ding. Cuvek a si tik ah an mai sung khal midang sungkhaw pawl khal a him nawn lo. Tu tiang ahcun zo bik an kai ti kan thei fiang hrih lo. Nauhak pahnih ralhrang pawl in an hrai ti lawngin kan thei” tiah PDF sungtel sungkua pakhat in a sim.
PDF pahnih ralhrang pawl ih an kaih mipawl cu India ram, More khawpi ihsin Tamu khawsung ih an nu le pa an vatlawnnak in an kaih mi asi tiah kiangkap naivai tupawl in an sim.
An mah an kaih ngah ruangah midang PDF sungtel pawl khal kilhimnak hrang an um tu dan rem awknak, tuah sal a tul ruangah hnatuan a ti tam tiah PDF sungtel pawl in an sim.
Tamu khawsung ih PDF tuanvoneitu pakhat in “An mai salsuak ruangih kan sung khaw pawl an tel ahcun kan riah a sia zet ding. SAC ralhrang pawl in nasa tuk ih, thu an suhnak ruangih an sal suak khal asile an kilhimnak zohman in tuanvo an lak sak cuang lo ding. Kan khawsung thu cu kan mah kan thei bik ko” tiah a sim.
Tufang ah Tamu tlunlam ih um ကွန်းတောင်း khaw lam ah SAC ralhrang pawl le PDF pawl, tlangpar hriamkai pawl karlak nitin deuh thaw in kahawknak a suak ih March ni khat ni khal ah ABSDF B-5 ih ralkap pakhat bomb peh ngah ruangah a mitthi an um.
Cuihleiah March ni 19 zaanlam khal ah Tamu peng, ကွန်းတောင်း khua cu SAC ralhrang pawl in ralthuampi thawn vei 30 hnak ih mal lo an kap tiah khawsung mipawl in an sim.