Sagaing ramṭhen Shewbo peng ကော့ khua ih ṭanhmun khuar Kawl ralkap le Pyosawṭhi pawl cu hriamhreipi hmangin tualsung hriamkai pawl cun an va kap ih senteri kil in ra suakvaktu Ralkap khal Drone hmangin bomb an rak thlak bet ih mi 4 hrawng an thih thu Black Wolf PDF cun thusuah an tuah. Mizansun July 24 zingpit nazi 8:45 hrawng ah khan ကော့ khua ih ṭanhmun khuar Kawl ralkap le Pyosawṭhi pawl cu 40mm bomb 10 hmangin an do, Ralkap, Palik le Pyosawṭhi an zaten mi 4 hrawng an thi ih mi 2 in hriamhma bese zet an ngah tiah Black Wolf PDF cun an thusuah ah an tarlang.

Ralkap le Pyosawṭhi mithi thuhla hi mit rori ih hmutu tualsung mipawl ih simnak vekin theihmi a siih an doawknak ah tualsung hriamkai lam cu zohman mithi le siatsuah aw an um lo thu an hotu cun a sim. Hivekin Bomb 10 rual kawmkhawm ih do an si hnu ah Ralkap pawl cu senteri kil dingin leng ah an ra tlansuak, cufang ah Drone hmangin bomb an rak thlak bet lala, leng ih ra suak Kawl ralkap pawl hi mithi an um ko ding tiah zum a siih paziat hrawng timi cu a cekci sim theih a si lo tiah an tarlang.

Hivekin Kawl ralkap le Pyosawṭhi pawl an va do thu ah Black Wolf PDF hotu cun “တအုံ khua ih mawhsualnak nei lo khawsung mi 7 kawl ralkap pawl in an thah ruangah kan nih khalin kan lehrul ve mi a si. Drone hmangih bomb kan thlak ṭum ah Kawl ralkap pawl cu Ui le Vok men bangin an tlan ciamco, Video record mi khal ah hmuh theih a si, ram mipi pawl humhim dingah kan nih cu ziang tik lai khalah man cia ringring kan si ko, tiin a sim.