မိုင်းရှုး pengih Shan miphun ralkap SSPP pawlih Camp 3 Ralkap an hnukdawk awk duhlo ruangah Ralkap council cun thazang tamzet kuat in doawknak an thawk tum, SSP lam khalin Shan ramsung hmun kip ih um an Ralkap pawl simthan cia in Raldoawknak lam ralring dingah theihternak an tuah
Shan ramkulh Thlanglam မိုင်းရှုး peng ih ṭanhmun khuar Shan State Progress Party (SSPP/SSA) Camp 3 pawl umnak hmunram ah Kawl ralkap thazang tamzet cu mizansun July 25 ah khan thazang an bet rero ruangah doawknak nasa zet a suah ding thu SSPP Central Committee thawn naivai pawl cun an sim.
Hivekin Shan ralkap le Kawl ralkap kahawk man cia ṭengṭeng ih an umnak sanbik cu kan dung July 21 sun ah khan မိုင်းရှူး khawpi thlanglam ih um လွယ်နိုင်း hmunram ih ṭanhmun khuar SSA ralkap camp 3 pawl cu anmah le ṭanhmun khuar nak ihsin dungsip ih hnukdawk aw thluh dingin Ralkap council lam cun an rak dil, asinan cui’ Ralkap council lam ih dilnak vekin an thlun lo ding thu SSPP/SSA lam cun thukhirhnak an tuah.
Cutin khat lam khat lam an dil ngen awknak zianghman ih an siarsak awklo ruangah mizansun July 25 zingpit nazi 7 hrawng ah khan Ralkap council battalion 150 hmunpi မိုင်းစံ ihsin Ralkap thazang tamzet cu မိုင်းရှုး lam pan in an feh, zinglam nazi 9 hrawngah ကွန်ဟိန်း ihsi khalin Ralkap motor 6 khat ṭhepṭhep in thazang an rak bet, cun sundir nazi 12 hrawng khalah ကွန်ဟိန်း-ကာလိ-မိုင်းစံ-မိုင်းရှုး zinpi zawh in Ralkap motor 11 rual an feh ih thazang nasa zetin an sekkhawl rero thu SSPP/SSA Central Committee thawn naivai pawl cun an sim.
Hivekin Kawl ralkap lam in doawknak thawk tum in nasa zetih ralkap thazan an bet rero ruangah SSPP lam khal cun Shan ramsung ih ummi an ralkap zaten tia aw cia ṭhepṭhep ih um dingin order pek an si tlun ah hmunram thuthang vek asile, Ralkap council Ni tlaknak lam ralkap hmunpi tiang rori do peh vivo thei dinhmun a si thu, curuangah Ralkap council hmunpi kiangkap ih um ram mipi pawl dinhmun in ralring tei’ um cio dingah theihternak khal an nei cih.
Ram mipi dinhmun khalin Ralkap council pawl cangvaihnak thuhla pawl cu mah le kiangkap naivai SSPP/SSA hnen ah thuhla simthan cio dingin dilngennak khal an nei. Lo theih lo ih doawk ṭul dinhmun kan thlen thlang raungah khui hmun ti umlo a remcan nak kip ih doawknak suak thei a si ruangah ram mipi pawl ih kan tawn dingmi harsatnak pawl cu bangran ten hmasawn ih tifel thluh dingin an ṭuan tlang ding thu SSPP lam cun theihternak an nei cih.
SSPP/SSA lam in Ralkap council an hun do taktak a si ahcun Myanmar ram cu hmunkip ah ralbuainak a khat thlang ding, Ralkap council khal an lu zing sinsin dingih a tawpkhawk dinhmun kan thleng thlang ding a si hi.