Thuneihnak latu SAC ralhrang pawl in mipi ralkap PDF le tlangpar hriamkai EROs then khat pawl Phawtpuar timi hmin pe in vanzam thawn nasa tak ih do dingah timlam awknak an neih thu theih a si.
Hi Phawpuar timi raldonak hrangah March ni 23 ihsin နေပြည်တော်၊ ရန်ကုန်၊ တောင်ငူ၊ မန္တလေး၊ ပုသိမ်၊ မကွေး၊ မိတ္ထီလာ ralhrang vanzam hmun pawl ih vanzam maungtu pawl cu raldo dingah man cia thepthep in timlamawknak nei cia in thupek lawng hngak ih an um thu Yangon ramthen ih Myanmar Ariforce thawn nai vai pawl in an sim tiah Irrawady times in a tarlang.
“Hi raldonak cu hmin cu phawtpuar tin hmin an pe. Raldonak vanzam pawl ahleice in raldo an zir ter. Cuisin vanzam maung tupawl khal hmun khat ah ko khawm in raldo an zir ter. Raldonak cu tuini ralkap ni zinglam nazi 2 ihsin bomb thla thok dingin an fial aw” tiah Vanzam ralkap thawn naivai mi thuthang hram pakhat in a sim.
Mi depde MAh ih hoha mi ralhrang hruaitu pawl ih fialnak in hi phawtpuar raldonak thok dingah timlamawknak an neih thu Magui van ralkap ih nai vai mi thuthang hram pakhat khal in a rel.
“Hi raldonak ih an hmui tin bik mi cu Chinram le Sagaing ramthen tin thu hla kan thei. Tu cu vanzam maungtu pawl khal ziang thu hla hman an sim duh lo raldo dingih an suah zik lawngah an sim” tiah Magui van ralkap thawn naivai mi thuthang hram in a sim.
Hi thuthang thawn pehpar in Irrawady times khal in ralhrang sunglam thuthang hram pawl ih an sim mi sirhsan in thuthang ti suah a si ih thuthang hram dang pawl khal ngah bet dingin an zuam rero lai tiah an sim.
SAC ralhrang pawl cun ralkap ni ih ralkap lam an tuah tik ah an mai thiamnak zawn tete langsar dingin Vanzam thawn bomb thlak in raldo an tuah thei tiah CDM ralkap sinak sang pakhat in a ruah dan a sim.
“Ahlan ihsin CNF hmunpi vanzam thawn bomb thlak awknak a um zo tik ah ralkap ni ah ralhrang pawl ih thazang langternak ah Chinram tipawl, Sagaing tipawl ah bomb a thlak thei. Daithlan a ngah lo. Cui sin vanzam kah thlak theinak ralthuam an nei lo timi an theih ruangah duh tawk in an kap thei ih, Leilam thawn an do tlang thei” tiah Vanzam ralkap ih CDM Captain pakhat in a sim.
