Kalay ihsin Chin ramkulh lam a sotu SAC ralhrang pawl cu March ni 20 in Falam ihsin Hakha lam pan ih an poksuak hnu March 21 ah Lungpi veng ah an riak ih sakhua biaknak inn tel in mipi inn 60 hrawng an bauh sak hlei ah inn sung ih um mi man nei deuh hlawnthil pawl an fir tiah hmin lang duh lo lungpi mi pakhat pakhat in a sim.
Falam khuapi Lungpi veng cu inn 66 hrawng um mi an si ih cumi sungah inn 5 lawng SAC pawl in an bauh lo. Sakhua biaknak inn tel in inn 60 hrawng cu sangka, sangkate le phar pawl siatsuah in an bauhsak. ei-in le man nei deuh thilri pawl an fir thluh tiah tualsung mi pakhat cun a sim.
A nih cun “Biak inn cu thilri retnak Gudaung ih hman mi inn 1 leh Pastor quarter, tualleng tlawng, Zung le Library ih hman mi inn 1 an bauh. Pastor ih Bawipa zanriah einak hrang hmanmi thilri pawl tel in man nei thilri pawl an fir ih Kaw-zaw pawl khal an thlek siat theh. Khawsung inn pakhat cu hriamhreipi in a ngah ih um hman tlak nawn lo khop in a siat reprep. A kiangkap ih inn 3 khal bomb peh ngah raungah phar a pop seksek. Inn an bauh ih thilri an lak mi ah Kalape le fang tivek ei-in lam deuh hi an la tam ih earphone le phone charger ihsin thok thil tha deuh an ti mi cu an lak thluh. Innsang pakhat tla cu an phone pakhat an rak tan ngah ih SAC pawl in an rak bauh siatsak thluh” tiah a sim.
Lungpi veng ih um mipi pawl cun SAC ralhrang pawl ih rannung vek ih an cangvaihnak sulhnu pawl mah le inn cio thianfainak an neih hnu ah tuini Marh 26 zaanlam ah biaknak lam inn siatsuahmi pawl thianfainak an tuan rero.
Chin ramkulh rak pantu SAC ralhrang pawl hi Falam peng zinnpi tluan ih um khua tin ah tlawnginn le biaknak lam thawn pehpar mi inn pawl khal hrial lo in inn bauhsaknak an nei ih rannung, fifir le suamhmang vek in an cangvai vivo tiah theih a si.
