Myanmar ramsung ralhrang pawl in thuneihnak an lak hnu ralhrang pawl, kaih tuar ih thah a tuartu minung 1070 an kim thlang tiah ramkhel thu ruangih thawngtla pawl bawmtu AAPP in March ni 27 ah thu an suah.
Kaih khih hnu ih an thah mi an timi sungah an kaih hnu thawng an thlak sungih thi tupawl khal siar cih mi a si. Himi hminsinnak cu 2021 February ni 1 ihsin 2023 March ni tiang AAPP pawl ih cazin an lak mipawl hram bun ih ngan suah mi a si ih, a tak ahcun hi hnak in an tam sawn thei tiah an sim.
Ralhrang pawl ih an kaih khih mi sung ihsin minung 776 pawl ih an suah kum pawl an la theh thei ih, an kaih mipawl hi a tlangpi thu in kum 35 in 36 hrawng an si, zatek 92 pawl cu mipi lawnglawng an si.
Ralhrang pawl ih an thah tam bik mi cu sagaing ramthen in 594 in an tam bik ih, Madalay ramthen in minung 119, Magui ram then in minung 101 pawl cu ramthen le ramkulh sungin an thah tam biknak hmun pawl an si.
SAC ralhrang pawl in an kaih mipawl an mi thah dan AAPP ih an tarlangnak ahcun meithal thawn kah thahnak, nung cingih meisa urnak, ralhmai ih thahawknak, ralphaw ah hamngin thahawknak, hngawng tanawknak, thawng inn sungih thahawknak pawl an si.
