Russia ram ni tlaknak thlanglam, Ukraine thawn an ramri kiangih Yeysk timi khawsung ah Russia raldonak Jet Fighter a tla ih mi 13 rori an thi, mithi pawl lakah hin nauhak 3 khal an tel tiah Moscow thuneitupawl cun an sim. Hi thil thleng mi thu ah Ministry of Emergency Situation ih simdan ah Raldonak Jet Fighter khawsung rori ih a tlak thu theih asi veten runsuah hnaṭuantu pawl an cangvai cih ih mi 3 ruak hmuh cih a si. Runsuah hnaṭuan pawl cun theitawp suah in an ṭuan peh vivo ih miruak dang 10 an sar bet tiin an sim.

Mithi pawl lakah hin nauhak 3 an telih hriamtuar mipum 19 an um thu khal Russia thuthang khalin an tarlang. Tuiṭum Yeysk khua ih tla puak Russia Jet Fighter hi Sukhoi SU-34 model pawl a siih a tlak hnu hin nasa zetin a puakih kangmei khal a suak nasa, Vanzam hi dăwt 9 ih sang mipum 600 hrawng umnak innpi zawn rori ih tla puak mi a si.

Hivekin Russia Raldonak Jet Fighter tlak ruangih nunnak liamtu pawl cu a ṭuldan ih zir in bawmnak pek an si ding thu khal Russia President Putin in a sim thu Kremlin cun TASS News agency hnen ah an sim. Russia rampi Ministry of Defense cun tuiṭum Sukhoi SU-34 tlak ruangih hi lawmman ih puak le kangmei suak thu ah Jet Fighter engine le tialh theih thun mipawl an alh puak ih cutin hivek thil thlengmi a si tiin an sim.

Russian hin Ukraine a simnak ah Raldonak Vanzam Jet Fighter le Helicopter tamzet Ukraine ralkap lam in an kah thlaksak lawng siloin an mahte cangsual khal ziang maw zat an um thlang tiah theih a si.