Russia ram in Myanmar SAC ralhrnag pawl ralthuam an bawm mipawl an cawl asile Myanmar ramsugn ih buainak, harsatnak pawl ihsin an zalen thei ding tiah American ramleng palai zung ih thurawn upa Derek in March ni 22 ah a sim.
“Tui dinhmun ah Russia ram cu leitlun ram pawl lak ah Myanmar ih a rinsan le a zaal batnak bik a rualpi tha a si ruangih Russia in a tuvek in bawmnak pe ding an si lo” tiah a sim.
Russia ram cun Myanmar SAC ralhrang pawl ih an mi thahnak hrang ti alh theih pawl a bawm ih, Hivek ih an tuahnak cun Asian khawmual ram pawl ih an zuam rero mi Myanmar ramsung remdaihnak hnatuan khal a ti siat ter thei tiah a sim bet.
“Ngaingai ten Myanmar ramsung buainak, cingfelnak ding lamzin kan hmu duh asile, Myanmar ramsung remdaihnak thawn Democracy lamzin par ih an feh sal kan hmu duh asile a cangthei mi lamzin a um. SAC ralhrawng pawl in ralthuam an lei thei nawn lo a si ahcun himi lamzin in a cang thei tuk ko. Russia ram in Myanmar ralhrang pawl hrang ralthuam an bawmnak an cawl asile kan nih pawl cun a thupi zet mi lamzin thar pakhat kan kar thei ding” tiah a sim bet.
Myanmar ramsungih bulpak, pawlkom pawl hremnak pek bet ding, ralhrang pawl ih ralthuam leinak lamzin harsa ding khal in American in a hawl vivo bet ding tiah a sim. Tuni tiangah American cun Myanmar ramsung ih bulpak minung 80 pawl le pawlkom 30 par ah hremnak an pe zo.
Myanmar SAC ralhrang pawl hrang raltuam lei dingin le raldonak hrang tii alh thei an leinak har vivo dingin hremnak pek vivo an tul lai tiah American ramleng palai zungih thurawn upa Derek in a sim.
Pursumnak ih hremnak lawng siloin American cun Asian pawl ih tuah mi an dinpi in le Myanmar ramsung kahdaihnak, dik lo zet ih an kaih mipawl zaten suah zalen ding, milai zawnruat ih bawmawknak pawl ramsungah bi khiah um lo in a luh theinak ding hrang ralhrang pawl an nor bet ding thu a sim.
