Kawl ralkap pawlih Meithal Lawngin tlansuahpitu Hakha mino pakhat ih inn Ralkap council in an khar sak

Chin ramkulh Hakha khawpi ah senteri kil Kawl ralkap pawl cu Hakha mino pakhat cun Ri thlekthlek in Zu a do hai hnu ah an meithal la in a tlansuak. Cui’ meithal tlansuahpitu Hakha mino pakhat ih inn cu Ralkap council pawlin July 23 sun ah khan an khar sak tiah theih a si. Himi Ralkap pawlih an khar mi inn hi meithal tlansuah pitu mino ih nulepai’ inn a si thu tualsung mi pakhat cun a sim.

Ralkap pawlin Inn an ra kharsak ah hin inn neitu te cu an um nawn lo, inn ih an umlonak a rei zet thlang, inntek tei’ tupa te in Ralkap pawl Zu a do ih an rit ngah ciamciam hnu ah an meithal a la ih an tlanhloh pi, cumi ihsi thawkin inn tekte khal an inn suahsan in an tlan ve, Ralkap pawl cun ram i kip an hawl nasa tiin tualsung mi cun a sim peh.

Hivekin Ralkap pawl ih kutkaih meithal laksaktu Hakha mino miralṭha le a sungkua pawl cu kan dung kum 2021 ah khan hmunhimnak an thleng thluh zo tiah theih a si.