Kai ih check felnak an tuah mi Ralkap council Brigade 44 hotubik Brigadier General တင်မိုးနိုင် cu a hnaṭuan ihsin an cawlhter ih Ralkap council neih mi Company ah an ṭuanter
Mon ramkulh သထုံ khawpi hrambun Ralkap council Brigade 44 ih an hotubik Brigadier General တင်မိုင်းနိုင် cu Ralkap council tlunlam hotu pawl cun a hnaṭuan Brigade pi hotu sinak ihsin an cawlhter ih Ralkap council neih mi Myanma Economic Holdings Public Company Limited ah an ṭuanter tiah Ralkap sung thuhla theifiang pawl hnen ihsin theih a si. Kawl ralkap Brigade 33 hotubik an kaih thu hi kan thuthang hmaisa khalah kan rak tisuah zo mi a si, a thuhla theih loin cān tawkfang zet a um hnu ah tuvekin a thuhla thar darhsuak sal mi a si.
KNU Brigade 6 hmunram sungah nasa zetin doawknak thawkih cangvaitu Ralkap council Brigade 44 hnuai ih Battalion 102 ihsin Captain ရဲရင့်မောင် ih hohanak in Ralkap mipum 6 pawl cu kan dung September thlasung ah khan hmundang ih um Ralkap sakhan pakhat ah ralthuam kuat dingin an feh ih hmunram an hloh ruangah an ralthuam phurh mi tamzet thawn KNLA pawlin nunglai in an rak kai ngah, cumi thu thawn pehpar in Ralkap council hotu luban lam cun Brigade 44 ih an hotubik Brigadier General တင်မိုးနိုင် cu Naypyidaw ah ko in check felnak an nei.
Cuitlun ah kan dung June thla sungih Ralkap council hotu Min Aung Hlaing thucah simmi Ralkap sung thuthup Ca pawimawh cu Brigade 44 hnuai ih Ralkap pawl hnen ihsin September thlasung thotho ah khan Social media parah mipi hmuh theih in a rak darh thluh, cui’ thu ruang khalah Brigade 44 hotubik hi check felnak an nei tiah theih a si.
A hnaṭuan thawn pehpar in Myanma Economic Holdings Public Company Limited lam ih an ṭhawn cu a nēm bik hremnak an pe tiih sim theih a si ko. Tui’hlan ih a Ralkap rank Brigadier General rank khal an hlawnsak, Ralkap sungah an ṭuan peh ter duh nawn loih MEC lamlam ah an kuat a si hi tiah CDM ralbawi pakhat cun a hmuhdan a sim. Brigadier General တင်မိုင်းနိုင် cu tuvekin a sinak hlawn thlak asi ruangah a aiawh tu ah Naypyidaw ih National Defense University principal Colonel ဝင်းနောင်စိုး an ruat tiah Ralkap sung thuhla theifiang tu cun a sim.
Tui’ dinhmun ah Karen ramkulh KNU Brigade 6 hmunhual ramsung ah hin Kawl ralkap brigade 44 hnuai ih ralkap pawl le KNLA karlak nitin rorin doawknak a suak ringring, Leipar doawknak ah Kawl ralkap lam ral an sung ringring deuh thaw a si, mithi, hriamtuar le nunglai ih kaih mi an tam, ralkap suahsan ih tlan khal an tam tiah theih a si.
Hivekin Ralkap council luban lam cun an ralbawi ṭhaṭha khal an lungkim lo zawngih an um cun an Liang ben hlihsak in an duhduh in an hlawn ih an duhduh nak ah an heih rero men. Ralbawi picang cin hman hivekih an ti ahcun ralkap nauta pawl cu ziangtak bang ha hai kei maw, Ralkap council sungah hi cun lungawinak hrimhrim a um ding khal zum a um lo.