Tuikum Manmar ramsungih phun 10 exam tuahtu then 5 then 1 lawng an um ruangah ralhrang pawl ih thuneihnak an lak hlan hnak in exam a tuah tu zatek 80 a ttum tiah Nikkei Asia thuthang cun an tarlang.
Fimzir zungin March ni 8 ihsin March ni 18 tiang exam tuah a si nan exam tuahtu tlawngta minung thawng 100 le thawng 60 lawngin exam an tuah. Covid-19 leitlun pulhnat a thlen hlan 2019 kum March thla ih an tuah mi phun 10 neita exam ahcun tlawngta minung thawng 900 lenglo in exam an tuah.
Hi exam tu suakthuan tlawng pawl hrangah a thupi bik mi neita bik exam a si ih, Myanmar ramsung tlawngta pawl hrang, phunsang tlawng, collage an kainak ding ih subject an hril theinak ding exam khal a si. SAC ralhrang pawl in thuneihnak an lak hnu 2022 kum March thla ah a hmaisa biknak exam an nei ih cumi ahcun tlawngta minung thawng 200 le thawng 80 in exam an tuah. Tuikum ahcun nasa tuk in tlawngta exam tu an ttum suk.
Yangon private tlawng zirhtu pakhat cun hivek ih tlawngta an malnak khal pursum leilawnnak ruangah a si tiah a sim. Covid 19 pulhnat ruangah mitampi cu tlawng an cawl ih, ralhrang pawl ih thuneihnak an la bet hnu in ramsung pursum leilawnnak a siat theh ruangah ramsung sumpai hawlnak a har vivo ih inn sang eiin hrang mi tampi in harsatnak an ton phah.
Tui dinhmun ahcun ramsung ih sumpai nei deuh, inn sang pawl cun an fa le pawl cu SAC ralhrang hnuai fimzirnak ih tlawng kai ding hnak cun, bulpak tlawng pawl, leitlun tlawng pawl ah kai dingah an thawn aw. Yangon ih private tlawng pakhat ih tlawngta pakaht khal ralhrang pawl ih on mi tlawng khal ka kai lo, exam khal ka tuah lo ding. Ka rualpi dang pawl khal kei mah vek thotho in an ruat tiah a sim.
Himi hrangah National Unity Government (NUG) acozah khal in thei tawk in fimzirnak lam a tuah sak vek in, doawknak a tamnak hmun pawl khal ah tualsung hriam kai pawl in an mai humhual mi ramsungah tlawng ongin zatlawng hlei cawi zirhtu pawl thawn thei tawk ih zirnak lam an feh thu theih a si. Cuitlunah tlawngta pawl hrang Internet, Online pawl khal in tlawngkai theinak an tuah thu Nikkei Asia thuthang in a tarlang.
