SAC ralhrang pawl ih thuneihnak an lak kum hnih lenglo sungah thuneihnak latu pawl do dingih ralthuam kaitu mipi ralkap minung 1500 zikte an thi zo tiah National Unity Government (NUG) acozah ih tuanvoneitu pawl in an sim.
Himi hminsin mipawl cu NUG acozah ih humhimnak zung ihsin an ban tawk an finkhawi mi cazin a si ih a tak ahcun hi ai hman in a tam thei lai tiah NUG acozah Prime Minister zungih spoke person ဦးနေဘုန်းလတ် in a sim.
2023 February 1 ih ralrang pawl in thuneihnak an lak mi poipeng caan thla 6 an tthan hnu ahcun SAC ralhrang pawl in mipi ralkap pawl cu a hmuh tu hmuahhmuah ih tih dingin kut tan, ke tan, Lu tan, rilphorh ih thahawknak pawl an tuah tiah Sagaing ramthen ih mipi ralkap pawl in an sim.
Himi cu SAC ralhrang pawl in mipi pawl ttih tthaih tahran in, kil an tum tinak tiin kan ruat tiah မြင်းမူ pengsung ih cangvaihnak neitu Acid mipi ralkap ကိုအက်ဆစ် in a sim.
A nih cun “hivek in an hngawng kan tan sak asile an tih dingih, dothelngnak tuahtu ralkap pawl dung an sip ding tin an ruah ruangah, kan hngawng tan in mi an that. Milai ruahnak fate hman tel riai lo in hmel siat ko in an tuah ih mi an theh. Asinan kan thinlung sungih kan ret ringringmi kan nih dothlengnak tuahtu mipi ralkap pawl cu ziangvek hman in hrin hro kan theih lo timi an nih pawl in an thei lo tla a si thei. Asilole thei na cingin an tuah mi maw kan thei lo. kan mah pawl kaih bet thei nak dingin in ttih ttaih in mi an that tin ka ruat” tiah a sim.
February ni 25 ah မြင်းမူ peng, ညောင်ပင်ကန် khaw kiangih bomb kaam dingih a zuam rero tu PDF ralkap pahnih cu SAC ralhrang pawl in an kaih hnu in February ni 26 ah an hngawng tan in an that tah a nih cun a sim. SAC ralhrang pawl tuveki ih an tuah mi hi an tuah kel phung tluk ah a cangih thinlung lam doawknak khal a si thei tiah Kaya hrambun mi ဒီးမော့ဆို mipi ralkap ih spoke person in a sim.
A nih cun “kei mai hmuhnak ahcun an thil tuah mipawl hi tuah phung cia vek ah ka ruat. Ralhrang pawl cun an tuah ringring mi a si ko. Khuinah hmun khal ah hivek in an tuah tik ah an mahte an pho lang aw. Ziangtluk in an sual, ziangtluk in an rap thlak timi an pho lang aw. Cuisin PDF a thar luttu ding pawl an hringhronak khal a si thei. Himi cu thinlung lam doawkna khal a si thei” tiah a sim.
Mipi ralkap lam ih an kaih ngah mi SAC ralhrang pawl cu hremawk le vuak velhawknak an tuah lo ih tlun ah hriam hma ngah an um khal le siivai thawn an rak tuam hlawm ih, rallam thlun dingmi daan ziaza vek in thlun in an hmang tiah a nih cun a sim.
Minung pakhat rapthlak zet in ziang pawlkom pawl khal an tuah a si ahcun himi cu cosan theih a si lo. rallam sual buartu an si tiah Yangon hrambun mi တရားလွှတ်တော် ရှေ့နေ pakhat in a sim.
Anih cun “ralhrang le ပျူစောထီး pawl lam ih an tuah mi khal a um thei. Cuvek thotho in SAC pawl dokalhtu PDF le ErO pawl, tlangpar hiram kai pawl khal in an tuah thei. Ziang pawlkom in an tuah khal a sile hivek hi cu ngaithiam thei lo mi sual tuah an si” tiah a sim.
1959 kum ralkap daan sung khal ah ralram ih raldonak pawl ah mipi pawl ziangvek in peh tlaih ding? Ralkaih mipawl ziangtin kan pehtlaih ding? timi cipciar in a um in a um a nih cun a sim bet.
PDF ralkap pawl ralram ah doawknak ruangah, kahawknak ruangih kap thah asilo mi kaih hnu ih Kut, Ke le hngawng tan tivek cu SAC ralhrang pawl in thuneihnak an lak hnu in a tam vivo tiah NUG acozah ih tuanvoneitu pawl in an sim.
SAC ralhrang pawl humhimnak tuahtu mipi ralkap pawl a tuvek ih an thahnak cu PDF pawl dinpitu mipi pawl thinlungah ttihnak lut dingin an tuah mi a si tiah NUG Prime Minister zungih spoke person ဦးနေဘုန်းလတ် in a sim.
“Hivek ih an tuah timi cu huaawknak pakhat khal a si. Cuisin mipi pawl ruahnak ah ttihnak thawn ciah neh dingin tumtahnak thawn an tuah tin ka ruat. Ziangruangah tile SAC ralrang pawl ih an that mi sungah mipi ralkap pawl, tlangpar hriam kai tupawl an tel vek in tualsung mipi pawl khal hivek in rapthlak zet in an that. Mipi ralkap pawl nan dinpi a si le, nan bawm asile hivek in thah nan si ve ding timi thusimnak ah an hmangih, mipi pawl ttihnak thawn ciah neh dingin an tuah mi a si tin ka ruat” tiah a sim.
Tui dinhmun ah SAC ralhrang pawl do phah ih nun thap tu pawl cu a man tuah theih lo mi, mi huaisen pawl an si ih, an tanta misungkua pawl bawm thei dingah NUG cun an zuam rero tiah ဦးနေဘုန်းလတ် in a sim.
Hivek puh tonawknak thawn pehpar aw in thu le hla thei felfai thei dingah SAC ralhrang pawl ih Spoke peson ZMT RFA in phone thawn an ko rero nan phone an kai thei lo.
SAC ralhrang pawl ih milai covo daan an phah bal mipawl hi finkhawi tha in diknak a suah theinak dingah kan tuah sal ding tiah Britist hram bun mi Myanmar milai covo network ih director ဦးကျော်ဝင်း in a sim.
“hivek ih sual an tuah mipawl tha ten hminsinnak neih a tul. Fumfe zet ih thu le hla kan ngah a tul. Tahthimnak ah khuinah hmun ah a cang? Cui hmun cu ziangpawl ih humhual mi a si? Himi battalion ih hotu pawl zo an si, thuneitu pawl the zo an si a zate thei dingih tuah a tul. Ralhrang pawl ih personal no. khal theih a tul. Himi pawl cu man nei zet mi သက်သေ pawl an si. Hiang pawl in hivek ih dik lo zet ih an tuah mi par ah thu dik suak dingin kan tuah a tul” tiah a sim.
