Chin ramkulh, Thantlang peng Khuafo khua cu March ni 29 zingah SAC ralhrang pawl in raldonak vanzam thawn bomb an thlak ruangah nauhak pahnih tel in minung 10 an thi ih, minung 20 hrawng in hriam hma nasa tak in an ngah tiah CNF spoke person Salai Htet Ni ih a sim thu Khonumtung Media in a tarlang.
Thantlang ihsin peng 5 hrawng a hlatnak Khuafo khua ah March ni 30 zinglam nazi 10 hrawngah doawknak um riai lo in SAC ralhrang pawl cun raldonak Helicopter Mi 35 hmangin bomb a thlak mi a si tiah an sim.
Chin National Front (CNF) Spoke Person Salai Htet Ni in “SAC ralhrang pawl ih bomb kahnak Mi35 thawn bomb a ra thlak. Nei ta bik kan theinak ahcun vei 9 tiang bomb a thla. Tualsung mi minung 10 an thi. Minung 20 hrawng in hriam an tuar. In then khat pawl a siat. doawknak zianghman um lo in bomb a ra thlak mi a si” tiah asim.
SAC ralhrang pawl ih bomb thlak mi ruangih a thi tu sungah kum 6 mi le kum 9 mi nauhak pahnih le nunau 5 an tel thu theih a si. Hriam a ngah tu sugn khal ah kum 9 mi le kum 10 hrihruai mi nau hak 2 an tel tiah theih a si.
Atuvek in bomb thlak ih mi an donak hi cu ralhrang pawl an mai tuah kel mi, mipi pawl bat in an do mi asi tiah Salai Htet Ni in a sim.
“khawsungah inn ur, doawknak a suak asile an puh ringring mi cu tualsung mipi ralkap pawl tlangpar hriam kai pawl an um ruangah tin khawsung, raltlan umnak pawl sullam nei lo in an siat suah theu. Tui siat a tongmi khawsungah kan mah CAN, CDF pawl an um lo. Thantlang khaw hnuai ih um mi tan hmun laknak hrang tha lo mi hmun ram a si. Cumi rori a tuvek in bomb an thla timi cu tualsung mipi pawl tum hrimnak thawn an do mi a si” tiah a sim.
Aliam cia mi March ni 27 ih a thlengmi a kum 78nak ralhrang ralkap ni ah thuneihnak latu ralhrang hotu mi hrokhrol MAH cun NUG, PDF pawl a som dawltu tlangpar hriam kai EAO pawl cu an hram in kan cimit ding tiih a tong suak hnu CNF hmunpi umnak Thantlang peng sung khua pakhat a tuvek ih bomb an thlak mi a si.
SAC ralhrang pawl cu Chin ramkulh ah lei ral hleiah van ral ihsin ramri nornak an tuah sinsin ih, 2023 kum January thla in Februah thla 2 sung lawngah vanzam thawn vei 100 lenglo bomb a thlak zo.
