Chin ramkulh Hakha peng Hniarlawn khua ah tuisun July 25 zinglam ṭausang nazi 11 hrawngah khan Kawl ralkap pawl cun khawsung ah khawmi Tlangval Salai Mang Lian Sang kum 22 mi cu meithal in an kap that tiah khawsung mipawl hnen ihsin theih a si. Hivekin Kawl ralkap pawlin khawsung tlangval an kah that thu ah “Kawl ralkap pawl khawsung an ra lut ih tualleng tlawngta nauhak tete pawl an tlan theilo pang ti phangin motor bike thawn ava feh, cutin tlawnginn lam pan ih a feh rero lai ah Ralkap pawl thawn an tawngih ih an kapmi a si tiah khaw tlang upa pakhat cun tualsung media the Chin Journal hnen ah a sim.

Salai Mang Lian Sang hi Hniarlawn khua ih an rinsan zetmi mino pakhat asi tlun ah Hniarlawn khua Baptist Kawhhran ah Darvuan hnaṭuan in Pathian rawngbawl rerotu khal a si. A ruang cu khawmi pawlin an la ngah thei zo. Hakha khawsung ih bu khuar Kawl ralkap pawl cu Hniarlawn khua an ra thlen ruangah khawsung mi ṭhenkhat cu hramlak ah an tlan, ṭhenkhat cu a tlan lo khal an um ve tiah khawtlang upa cun a sim peh.