SAC ralhrang hotu ih thuneihnak a hnget khauh sin theinak ding hrangah ralhrang sinak ten nau pawl nun an thap rero timi ralhrang sungtel pawl in thei thiam dingah Kareni ralkap ih spoke person ခူညေးရယ် in asim.
2023 kum thok lam ihsin Kareni ramsung cu SAC ralhrang pawl in ralkap thazang, ralthuam thazang tampi thawn ramri an nor ih, Kareni tangrual ralkap pawl ih an rak donak in ralhrang sungtel tampi an thi. ဒီးမော့ဆို peng, ဒေါတမကြီး doawknak pakhat lawngah SAC ralhrang lam in minung 90 lenglo an thi ih, doawknak khal a sosang lai tiah KNDF in thu an suah.
“ဒီးမော့ဆို nitlaknak lamah ralhrang pawl thazang an bet aw. ဒေါငံခါးတို lam, မိုးဗြဲ lam khal ah an bet aw thotho. Cuisin Shan, Kaya ramri ဖယ်ခုံ nisuahnak lam ah nasa tuk in ramri an nor. Hivek ih an cangvaih tik ah kan nih khal in kan thei tawk, kham aw in kan do ding a si mai. Kan kham ding timi ih thupi bik cu kan lungput a si. Ralthuam thazang kan thlau aw tuk nan kan nih cu thinlung kan nei. Kan nih cu a va do tu kan si lo. an mah sawn in mi an ra do. In ra do tik ahcun kan kham aw ding thei tawk in” tiah KNDF spoke person ခူညေးရယ် in a sim.
Tui ramri nor ih a ra tu SAC ralhrang pawl cu ton teh zianghman an neih lo hleiah hmun ram le boruak dinhmun, an thinlung ruahnak an tha nau ruangah doawknak ih feh ding an hreh tuk tiah ခူညေးရယ် in a sim. “an nih pawl cu thi ding rori ih pumpe aw vek an si. Tlun lam upa pawl ih thuneihnak an kaih hnget thei nak ding hrang kan do timi an mah rori khal in theih hman an thei lo men thei” tiah a sim.
Cuitlunah SAC ralhrang pawl ih a sangsang ten thu an pek aw mi, an el ngam lo mi parah ralhrang sungtel pawl in tui dinhmun hi ruat sal ding khal in ka thei ter duh tiah ခူညေးရယ် in a sim.
“Ahlan kan hmuh dan cu thu khat a si. Tlangpar mipawl ih, ramsungah hivek in thil a cang timi an mah hman in an thei lo. cui sin Progaganda thawn an tuah mi videos pawl zoh in kan nih pawl cu tapung tin in hmu. A tu cu an mah khal in an thei thlang. Tahthimnak ah Sagaing le Mgui lam ih thilcang mipawl hi kan mah thawn bangaw ih kan tuar thlang tik ah an mah pawl ka sim duh mi cu tu hi ramkhel lam hnak in SAC ralhrang hotu pawl an thu neihnak an kaih hngetnak ding hrang an tuah sak rero timi an mah pawl ka sim duh” tiah ခူညေးရယ် in a sim.
Kareni ramah thalpau dothelngnak a thok ihsin mipi tangsungih tlan lut duh tu palik le ralkap pawl, lungawi sopar ten an hmuah ringring thu ခူညေးရယ် in a sim.
