SAC ralhrang an tha le zang theihtheih zet ih a ttum suak ruangah ralhrang sinak nau ta deuh pawl ih an fa nau pawl cu khawpi sung le ralhrang camp lenglam ah kilhimnak an lak ter thu ralhrang sung thuthang hram pawl in an sim.
Nyipidaw ralhrang hmun ih hmin lang duh lo pakhat in “ralhrang fa le sungah kum 18 kim hrih lo mi an um. Meithel a keng theitu pawl cu duty le upa pawl kilhimnak an lak ter. Hivek ih an fial awk ruangah mi tam sawn pawl cu an lung a kim lo”tiah a sim.
SAC ralhrang pawl in thuneihnak an lak kum khat a kim hnu, SAC ralhrang pawl ih sinak niam deuh pawl ih an fa le pawl cu camp sungah kilhimnak an la ter thok ih, tu ahcun camp sung lawng si nawn lo in khawpi sung le upa pawl tiang kilhimnak an lak ter mi a si.
Hivek in ralhrang sinak niam ih fale pawl hnatuan an fial raungah then khat nu le pa pawl cu an fa le pawl, hmun dang ih tlawn ternak, training an kai zikte vek ah sakhuanak lam pawl ah an lut ter tiah mipi lam dinpi ih a tlan luttu CDM sen 3 Kyaw Nai Soe in a sim.
SAC ralhrang pawl in thuneihnak an lak hnu mipi ralkap pawl le ralhrang pawl karlak ramih kip ah kahawknak a suak ih, ralhrang pawl cun ral a do lo mi zunglam ih hnatuantu ralkap pawl tiang ralhmai ih an kuat thu theih a si.
Curuangah ralhrang dunglam battalion pawl ih kilhimnak tuanvo cu ralhrang nupi pawl tiang an tuan ter mi a um. Mi depde, mi hrokhrol MAH Myanmar ralkap bawi a tuan thok ihsin Myanmar ramsung ralkap tuan dingih a diltu an um nawn lo ih, nitin ralkap lut thar hnak in a thi tu an tam sawn thlang.
SAC ralhrang pawl nasa tak ih dotu mipi ralkap pawl le ralhrang pawl karlak nitin deuh thaw in doawknak a suak ih ralhrang pawl cu nitin an thi. Cuvek ih an thi rero ruangah minung thazang bet aw dingin an zuam rero nan hlan vek in an ralkap thar an ko thei nawn lo. Curuangah Social midia hmangin hnatuan ko vek in an um ih, bum awknak thawn mi an khaih hrem mi khal a um tiah CDM ralkap pawl hnen in theih a si.
SAC ralhrang pawl in thuneihnak an lak hnu ralhrang pawl suah san ih CDM tuahtu le hriam hma ngah tu theihtheih zet in an tam vivo ih thazang, an bet aw thei nawn lo dinhmun ah an um tiah Myanmar ralhrang pawl ih dinhmun thlirtu pawl in an sim.
Tufang ah SAC ralhrang pawl suah san ih CDM tuahtu ralkap minung thawng 10 lenglo an um zo ih, tu hnak ih tam sin in mipi pawl dinpi bet ding khal in National Unity Government (NUG) le mipi ralkap pawl in an sawm.
