Ukraine ram an donak ruangah Russia cun ralthuam sumdawnnak lam ah a thu tiam kam vek in a tuah thein awn lo tiah India airforce pawl in an sim.
Doawknak sunglawng ih an thinlung an pek ruangah Russia ram cu India ram ih an kuat dingmi ralthuam pawl an ni tiam a kim zo nan kuat thein awn lo ih an um thu India airforce pawl in an sim. Hivek hi cu India hrang ralthuam a kuat ringringtu Russia ram thawn an kalak hmuh thiam awk lonak tiang a thleng thei mi a si.
India van ralkap palai pakhat in India hluttaw ih humhimnak lam thu a simnak ah Ukrine ram buainak ruangah Russia cun ralthuam pawl kuat dingih an thu tiam vek in an um thei nawn lo tiah a sim. India ram cun Russia hnen ihsin ralthuam then khat an cah thu, cui palai in a rel. Asinan India palai cun Russia hnen ihsin ziangvek ralthuam an cah timi cu, cipciar in a sim fing lo.
Thuthang hram pawl ih an tarlang vek asile India ralkap hrang tufang ih an tul bik le an hrang ih poi mawh bik, an cah dingih an ruah mi cu S-400 van ralkhamnak missile phun a si. Himi phun cu India in 2008 kum ah dollar 5.4 billion thawn lei aw dingin hmin an khen zo. Tuini tiang India ram cun S-400 phun 3 an dawng fel zo ih a dang phun hnih an hngak lai.
Cuitlunah India ram cu Russia hnen ihsin Su-30MKI le MiG-29 Jet vanzam pawl ih thilri thleng ding pawl khal an ring. Russia cu leitlun ih ralthuam zuarsuak tam bik a pahnihnak ram an si men thei nan, Ukrine ram phuh mawh in ramdang ih ralthuam a zuar thei nak kan dung kum ihsin theihtheih zet in a ttum suk tiah theih a si.
Hi dinhmun cu humhimnak hrangih Russia ralkap pawl ring emem tu India hrangah thu ruah a ti tam ter vek in khat lam khal ah American le Nitlaknak lam ram pawl in India ram cu ralthuam zorh in Russia ram ih ciahnehnak ihsin kham thei ding khal in an zuam rero.
