American President hlun Donald Trump cu 2016 vote a hawlnak sungah pron huleng pakhat kut dung let san ih sumpai a pek mi thawn pehpar in Mahatan district thuthen zungin zingzoinak an tuah raungah thuthen zungin thu buai an tuah pang asile siatralnak a thleng thei tiah a mai Truth Social ah ngan in ralrinnak a pe.
Kan dung zarh sungih thu hla put suak mi vek asile zingzoinak an tuah sungih an kaih ding thu Trump in a rel ih, a mah an kaih pang asile “duhphorhnak nei in rampi kil sal uh” tiah Tramp in a mah dinpi tu pawl a sai thawt. Cumi ihsin thok in President hlun cu Mahanta district thuthen zungih thuthentu Elvin Brett cu Social media sungah an do thok ih zingzoinak le ramkhel thu an hnamhnoih awk ter tiin district thuthentu a hnatuan in cawl ter dingah an dil.
“American santhuan thu sungih vote tam bik ngah tu President hlun, a ra dingmi hrilawknak hrang tu tiang kai hruai rero tu Rebublican palai pakhat ziangvek sualnak thawn thu buai an tuah sak tum? Ziang sualnak hman a nei lo mi sual an puh a si ahcun rampi hrangah siatralnak tampi a thelng thei. Zo in ziangruangah hivek thu buai an tuah ding? American rampi hua emem tu mi aa pawl lawngin hivek thil an tuah ding” tiah Trump in a ngan.
District thuthen zungih an zingzoinak ah President hlun Trump ih thupek in Pron huleng Stormy Daniels cu kut dung let san in kaa cip man American dollar thawng 100 le thawng 30 a pe tiah Trump Lawyer Michael Cohen in thetti pakhat in a sim suak zo.
Tufang ah district lawyer cun Trump in Michel Cohen cu thuthenzung hnatuannak hrang sumpai a suah sak mipawl a mai sumdawnnak ah eiruknak a neih le neih lo ziangzoi rero lai a si. Trump amah an kaih ding, zum hmang ih a tongsuak hnu Republican hluttaw palai pawl in President hlun cu an dinpi ih, thuthen zungih Lawyer Brett cu Congaree Lower House hmai ah thu rel suak dingin Republican pawl in an dil.
