Leitlun thuthen zung ICC in thu buai an tuah sak hnu, kaih theihnak warrant an pek mi Russia President Pu Tin kai dingih a zuamtu hmuahhmuah cu Russia ram par ah ral kan tho tiih an thlangthan tluk in kan ngai ding tiah President Putin ih rinsan mi khal si, Russia Presiden hlun khal si Dimitri Vavedev in ralrinnak a pe.
ICC in kan dung zarh tlawngkai ni 5 ah Ukraine nauhak zatel pawl cu hramhram in an dawi suak timi puh mawh in Russia President Vladimir Putin cu kai dngin warrant an pek mi a si.
Hi thuthawn pehpar in Russia president pakhat lawng in himi sualnak ih mawhphurhnak pawl a la theh ding tiah ICC thuthen zung cun an sim.
Asinan President Putin kai dingin an zuam a sile Russia ram par raltho tluk in kan ngai ding tiah tufang UN Security Council ih vice President tuan rero lai tu Dimitri Vavedev in a sim.
“Ngaingai ahcun hivek dinhmun cu ziangtik hman ih thleng lo dingmi a si. Ziangvek asi khal le a thleng zo tiah ruat uh. Nuclear ralthuam a nei mi Russia hruaitu Germany ramsung a feh ruangah an kai tin ruat hnik uh. Ziangvek a thelng ding. Hivek ih an tuah ahcun Russia ram hnenah ral kan tho an ti thawn a bang aw. Hivek in an kai a si ahcun kan neih mi ralthuam hmuahhmuah, Missile zaten Germany ram ih poi mawh mi zung pawl ah a zam lut ding” tiah Telegram thuthang videos pakhat ah a sim.
Kenya ram thung cun ICC ih kai dingih warrant an pek mi cu cosan theih a si lo mi lamtang nei ih thu thencatnak a si ih, sullam a nei lo tiah an sim. Rallam sualnak thawn an puh mawh mi cu Russia tuanvoneitu lam in an rak hnol sak ih, hi Ukarine ram thu buai ahcun Nitlaknak lam pawl ziang thei lo vek ten an um aw ter tiah an sim.
2022 February ni 24 Russia ramri nor pawl hi leitlun ralpi veihnihnak hnulam ih thahawknak ralbuaipi thlengmi a si ih, kum 1962 Cuba ramsung buainak ti lo ahcun Russia le Nitlaknak lam ram karlak engtaiawknak pi bik khal a si.
