Magway ramṭhen ih hrambun PDF ṭangrual pawl cun Operation Zayar Thaw timi hminbun in Ralkap council donak mission an thawkih a hmaisabiknak ah Ralkap 7 an that cih

Magway ramṭhen sungih hrambun tualsung hriamkai PDF pawl cu hmun khat ah ṭangrual thluh in Operation Zayar Thaw timi hmin an bun ih ပေါက် peng ihsin Ralkap council donak cu tuisun July 26 ihsin an thawk thu PDF Pauk Battalion 4 cun mipi theihternak an nei. Himi Operation Zayar Thaw timi mission sungih tel tualsung hriamkai pawl hi an zaten pawkom 8 lai an si ih tuizing khawvang hlan nazi 5 ihsi khan ပေါက် peng တပ်ကုန်း khua ih ṭanhmun khuar Kawl ralkap le Pyosawṭhi pawl an va do tiah an thusuah mi ah an tarlang.

Pyosawṭhi pawlih umcilhmi တပ်ကုန်း khua doawknak cu zingpit nazi 5 ihsin nazi 7 tiang an rei ih an doawknak ihsin Kawl ralkap 7 an thi, hriamtuar khal an tam zet, tualsung hriamkai ṭangrual lam ihsi cun zohman mithi le siatsuah aw an umlo tiah theihternak an nei. Kawl ralkap lam hi mi 7 an thih lawng siloin an ralthuam hriamhrei ṭhenkhat khal PDF pawlin an laksak ngah, Uzi cerek 24, G-3 cerek tlawn 3, 5.56 cerek tlawn 69, pistol cerek 29 le kut den bomb pakhat tipawl an lak sak ngah thu an tarlang.

Ralkap council in July 25 sun ih an khai thatmi mi 4pawl lawng asilo, dothlengnak ih nunnak liamtu kan unau pawl zate hrangah himi mission hi kan thawknak a si. Ṭih le phang rero cingih dothlengnak tuah kan si lo, ram mipi duhnak cu ngai thupi in a cem tiang rori kan do ding a si tiah PDF Pauk battalion 4 ih an hotu pakhat cun a sim.