သံတောင် pengih ni 4 sung doawknak ah Ralbawi 4 telin ralkap 25 rori an thi, Ralbawi kum 22 mi cu a ruak khal hlawmtu um loin an hlawn ta men

Karen ramkulh သံတောင် peng ah kan dung July 15 ihsin July 18 tiang ni 4 sung a pehpeh rorin Kawl ralkap le tualsung hriamkai karlak kahawknak a suak ih Kawl ralkap lam ihsin battalion hotu Lieutenant Colonel rank nei cin ralbawi picang le ralbawi dang 4 telin Ralkap 25 an thi ih cui’ ralbawi mithi pawl lak ihsin kum 22 mi  Ralbawi bohnih လူမင်းဟန် ih ruak cu hlawmtu khal um loin Kawl ralkap pawlin an hlawn ta men tiah North Tan Taung Defense Force ih an hotu ဦးမုတ်ဆိတ် cun a sim.

An doawknak hmun le an doawk dan pawl cu July 15 sun ah khan သံတောင် peng မင်းလမ်းkhaw uksuh ရွာသစ်ကုန်း le စုစည်း khaw kiang tipawl ah nazi 2 sung lai rori nasa zetin kahawknak a rak suak. A thaisun July 16 cu nu ni hlawhte rori an kapaw, July 17 sun khal zingpit ihsin sunhnu nazi 2 tiang rori an kapaw sal ih, simlam nazi 4 ihsin zan nazi 7 tiang an kapaw sal, cun July 18 sun khal nazi 1 sung hrawng nasa zetin kahawknak a suak sual tiah theih a si. Cui’ ni 4 sung nasa zetih an doawknak ah Kawl ralkap lam ihsin battalion hotu siseh Ralram ih an hotu siseh Company hotu siseh an zaten ralbawi 4 telin Ralkap 25 hnakih mallo an thi, hriamtuar khal an tamzet tiin an sim.

An doawknak ih Kawl ralkap pawl an duai ruangah hriamhreipi 60mm le 120mm pawl nasa zetin an kap ciamco, khawsung pawl ah an hriamhreipi an tla puak ih ရွာသစ်ကုန်း khua inn 8 siseh စုစည်း khua inn 4 tipawl cu an kangziam thluh. Cun Caw 2 le Na 2 khal Kawl ralkap pawlin an kap that, Vok 5 an that ih an ei, doawknak kiangkap naivai ih khua pawl cu an khawsen in hmunhimnak ah an tlan thluh. Ni 4 sung doawknak ah hin kan ni lam cu zohman mithi le siatsuah aw kan umlo tiin North Tan Taung PDF hotu pa cun a sim peh.