SAC ralhrang pawl in nasa tak ih timlamawknak an neih mi 2023 rampi hrilawknaknak ah Chin National League for Democracy (CNLD) party cun party din peh theinak register tuah an tum lo thu theih a si.
SAC ralhrang ih Election Commissioner hnenah register kan tuah lo ding tiah CNLD General Secretary U Sing Tun in Khonumthum media thawn tonsuhnak an neih mi ah a tuvek ih a let mi a si.
Ramkhel party register tuahnak daan thar cu SAC pawl in 2023 January thal thar ah an thun lut ih himi daan thar vek asile ni 60 sungih register a tuah lo mi party pawl cu ramkhel party ihsin hlon an si ding. SAC ralhrang pawl ih an tuah dingmi rampi hrilawknak a zuamtu ding register tuahtu party 33 an um zo tiah Election commisonner zungin March ni 21 ah an tlang than.
Register tuahtu party sungah Myanmar rampi huap in a zuamtu ding party 8, Ramthen le ramkulh sungih a zuamtu ding party 25 an um. Party register tuah theinak cu 2023 March ni 28 ni nei ta bik ah ret in dil dingah SAC ralhrang pawl in an bi khiah ruangah party dil theinak caan zarh khat hman a tang nawn lo tinak a si.
SAC ralhrang cun 2023 kum rampi hrilawknak cu, August thlasungah tuah dingin an rak tlangthan zo nan hrilawknak ni an tthawn sal tla a si thei tiah thu hla a leng vak khal a um.
