Chin ramkulh, Paletwa pengsungah SAC ralhrang pawl in thilri phurh ding an bi khiah sak ruangah fangcang man pawl kel awh thei nawn lo in a man nasa tuk in a khir tiah theih a si.
Ahlan ahcun ပေါ်ဆန်မွှေး dip khat ah thawng 60, 70 lawng a rak man nan tu ahcun thawng 80 in thawng 100 tiang a man a kai so tiah tualsung mipawl in an sim.
SAC ralhrang pawl le Arrakan Army (AA) karlak doawknak a suah sal hnu in, Paletwa peng tualsung mipawl cu hmun dang pawl vek in thilri duhduh in, zalen zet in phurh sukso an siang nawn lo ih, Paletwa hram bun mi SAC ralhrang ih Kerang ralkap ခမရ 289 battalion pawl hnenah siannak dil in an bi khih mi tiang lawng phurh a theih ti khal in an sim.
Paletwa tualsung mi pakhat in “thilri phurhnak ding hrang ralhrang pawl hnenah siannak kan dil asile zarh 1,2 sung a rei tu khal an um. Ngaingai ahcun sumpai mi dil tluk an si. Kan theihnak ahcun vei khat phurh ding asile thawng 300,400 pek an tul. An mai bi khiah mi tlun lam kan phurh le mi an lon sak mi khal a um tin kan thei. Curuangah mipi vantlang pawl hrang ahcun hlan vek in khawpi sungah feh in Fangcang an lei thein awn lo ih, Fang sum tuahtu pawl hnen lawngin lei a theih. Fangsum tuahtu pawl khal in Gate ih an pek mi sumpai pawl ngah sal thei dingin a man, kai ter in, an zuar. Cuaruangah Fangcang man a kai thehnak a si” tiah a sim.
Curuangah Fangsum tuahtu pawl hnen ti lo ahcun tualsung mipawl in ကျောက်တော် ah mah rori feh in fang an lei thei nawn lo ih, Fang sum tuahtu pawl hen lawngin man tam ngaingai pe in an lei tiah tualsung mipawl in an rel.
Paletwa khawsungih dawr neitu nunau pakhat khal in “kan nih Paletwa ahcun thilri man a ttum timi a um lo. a man lawng a kai. Ralhrang pawl ih siannak la in sum tuah pawl khal in fangcang an phur. Fang, a cem ti um dah lo in a man lawnglawng a kai. Thilri la dingih siannak an va lak thok ihsin sum tuahtu pawl cu Ralhrang pawl in cumi cu cu zat in nan zuar ding tin a man an khiah sak cia. Ahleice in thilri man an mah in an kaih sak thawn a bang aw. Asinan Fangcang man cu hmun dang pawl hnak in a man a tam” tiah a sim.
Tufang fangcang cu, mi zaran le hnatuan neitu pawl hrangah harsatnak a um lo nan mi men men, nikhat hawl nikhat eitu pawl hrangah an harsa tuk tiah paletwa khawsung mi pakhat khal in a rel.
“Tu cu bomb ttih ruangih tlang loo tuah ngam lo cu ret that, a hlan vek in ကျောက်တော် lam feh motor Lawng hmangtu an um lo raungah sum lut a um nawn lo. Gate man pe thei pawl cu Lawng tum deuh pawl thawn an feh thei. Curuangah nikhat tuan nikhat eitu hrang ah cun a ol lo. Fang man le tum ti um lo in a kai lawng a kai tik ah khuinah ih sum lut thawn kan ei ding ti hman kan ruat thein awn lo” tiah a sim.
Paletwa khawpi cu thliri, eiin an phurh awknak hrang Paletwa – ကျောက်တော် lamzin pakhat lawng a ringtu an si. Asinan Paletwa le ကျောက်တော် karlak ih tidai lamzin, cu SAC ralhrang pawl in 2022 August thla ihsin an rak phih. Cumi ihsin 2022 November ni 26 ah SAC ralhrang le AA karlak milai zawnruatnak thawn kaphnih kahdaihnak an tuah hnu in SAC ralhrang pawl in Rakhai le Chin ramkulh pawl ih lamzin tthen khat an phih sak mipawl an ong sal ko nan Paletwa peng sungah cun zalen zet ih feh sukso theinak an nei thei hrih lo tiah theih a si.
