NUG cozah cun pangai tei’ an neih ringring ṭheumi tawnkhawm lairelnak cu ṭhulh hrih in NUG president Duwa Lashi Lah, NUG Prime Minister မန်းဝင်းခိုင်သန်း le NUG tlangsuak upapawl telmi thupawimawh zet (emergency) meeting an tuah ih an ṭuanpi pawl thawn an zataen ṭangrual in Ramthukhel lamzin, Rampi palai lamzin, Ral thu ah siseh lamzin a phunphun hmangin dothlengnak nasa zetih an fehpi ding thu tlangthannak an nei.

Democracy cangsuak thei dingih zuam rerotu mi 4 pawl khai that an si zo ruangah tui’ dinhmun ih an kaihmi Ramkhel hruaitu pawl le Rampi democracy cansuah theinak dingih cangvaitu an kaihmi pawl nunnak hrang thlaphan um zet a si ruangah tui’ dinhmun hi zapite lungrual zetin le timlam cia ṭhepṭhep in lehrulnak dan ding hnaṭuan pawl relkhawmnak an nei.

NUG cozah hin ziangvek in Ralkap council doletnak an nasa ter sinsin ding timi pawl cu cipciar in an tarlang lo. NUG prime minister မန်းဝင်းခိုင်သန်း cun NUG cozah ih thusuah tuahmi pawl, tawnkhawm lairelnak ih relmi pawl cu kan relmi vekin kan tuah taktak ding a si. Cui’ tlun ah ram mipi pawl lamzin a phunphun ih harsatnak an thlen rero lawng siloin tuiṭum ih mi 4 an khai thatmi pawl hin sualralnak rapthlak tawpkhawk an thleng timi a langter, curuangah Ralkap council hotu Min Aung Hlaing le a kaihhruai a milai pawl cun an phutawk zet hremnak hmasawn thei ve dingin NUG cozah cun hma kan la vivo ding as i tiin a sim.

Tualsung hriamkai pawlkom dangdang khalin tui’hlan hnakih nasa sinsin in Ralkap council an do ding thu thusuah an run tuah cupco thlang, mizansun July 25 ih Ralkap council in an khai thatmi mi 4 pawl ih thihnak hin tuiṭum dothlengnak ih thisen dai zopawl khal a cawktho sal tluk a si.