North Korea ih milai covo daan an pah bal mi thuthawn pehpar in UN Security Council sungtel pawl ih an titinak thu pawl UN ih WebTV ihsin live thlah ding an sian lo ruangah North Korea pawl ih puar thau zet zet ih an cangvaihnak pawl hup phen sak an tum tiah American cun an puh.
“Then khat UN Security council pawl in N.Korea acozah hum sak tumtu an um” tiah UN palai American palai Linda Thomas Greenfield in China le Russia tis an lairelnak sungah a sim.
Leitlun remdaihnak le kilhimnak cu kilkhawi dingin tuan vo a latu sungtel ram 15 tel mi Security council cun milai covo thu relkhawm lo dingin China le Russia in an hnol.
Hi lairelnak cu UN milai covo council pawl le UN General conference pawl ah UN sungtel dang pawl ih rel dingmi a si tiah hi ram pahnih cun an sim.
American le Albinia pawl ih an hoha mi hi lairelnak cu ziangvek lam khal in palai thurelnak a si thei lo tiah China UN palai Shin G saan in a sim.
“ei aiawknak pawl a reh ter lam hnak in buainak ti sosang ter tu sullam nei lo mi a si Live thlah ding hrangah UN WebTV hamngin UN hmai ti bal ter thawn a bang” tiah a sim.
UN council sungtel 15 pawl cun hivek ih titi lairelnak cu UN ih Website ihsin live thlah ding an lungkim khawm theu ih, hivek ih kham awknak cu a um dah kel lo mi a si tiah palai pawl in an rel.
North Korea ih Nuclear le missile hruai khawi theih hnatuannak hi thuneihnak latu acozah ih milai covo pah balnak thawn a pehpar mi a um tengteng ding tiah Linda Thomas Greenfield in a sim.
