Mizansun July 24 ni khat sung lawngih Myanmar ramsung ralbuai ih doawknak ah Kawl ralkap lam ihsin mi 70 hrawng an thih thu NUG cozah cun thusuah an tuah. Ni khat sung ramsung ralbuainak thu ih Kawl ralkap mithi cazin tarlangmi hi hmunram taktak ahcun hi hnakin an tamsawn men thei ih hriamtuar pawl khal mipum 27 an kim tiah NUG cun a tarlang.

NUG cun ramsung ralbuainak lam cu tui’hlan hnakih cak deuh in an fehpi ih June 7 ihsin July 6 tiang thlasung ralbuainak ah Kawl ralkap 1975 an thi ih mipum 890 in hriam an tuar thu NUG cun an sim.

Mizansun Ni khat sung lawngih ramsung ralbuainak hmunram pawl cu Rangon ramṭhen, တနင်္သာရီ ramṭhen, Kachin ramkulh le Magway ramṭhen tipawl ah ṭum khat ciar, Sagaing ramṭhen ah ṭum 9 tipawl an si. Cui’ tlun ah NUG in ramsung ah Ral a phuan hnu kum khat sung ralbuainak ah Kawl ralkap 16,000 lenglo an thi ih hriamtuar mipum 5,700 lenglo an um thu khal NUG cozah ministry of defense ih thusuah mi vekin theih a si.

Kum khat sung doawk thu NUG in an tarlangmi hi 2021 Jun 1 ihsin 2022 May 17 tiang an tarlangmi ahcun Ralkap 15000 hrawng an thi tiin an tarlangih 2022 June thla ta le July thla ta an tarlangmi ih ralkap mithi thawn kan kawm tikah Ralkap 16,000 lenglo an thih thu NUG ih thusuah mi sirhsan in theih a si. Cun NUG cun Rampumhuap ah hmunram zatek 50 zikte an tlak theizo thu siseh Sagaing ramṭhen le Magway ramṭhen ih Zinpi zatek 90 lai khal PDF pawlin an thunun thei zo thu mipi hnen theihternak an rak tuah zo.