Chin ramkulh, Mindat peng, Matupi peng, Sagaing ramthen, Kalay peng le India ram, Mizoram sungih raltlan pawl cu Network For Chin Community Development (NCCD) pawl in eiin thilri bawmnak an pek thu theih a si.
NCCD pawlkom cun tuikum February thlasungah Chin ramkulh, Mindat pengih ralbuainak ruangih a tuartu khaw 18, Matupi peng sungih khaw 5, Sagaing ramthen, Kalay peng sungih raltlan hmun 4 le Mizoram Champhai district sungih, Holy cross Camp, ITI camp 1, Uilui camp, ITI camp 2 pawl ah fang le eiin then khat an zem thu theih a si.
“An bawm mi thilri pawl cu fang, siiti, ci pawl an si. A zem suahnak khal ah Camp asilo le khua ih IDP tuanvoneitu pawl relpi in kan zem. Inn sang zir ih sumpai zemawknak cu a um lo” tiah Network For Chin Community Development (NCCD) pawl ih tuanvoneitu Chin Kyi in a sim.
Network For Chin Community Development (NCCD) pawl cun raltlan camp pawl ah bawmawknak le raltlan camp asilo mi ralbuai ruangih mai hna kel tuan thein awn lo ih eiin harsa khaw pawl khal ah bawmnak phun 2 then in an bawm thu a sim bet.
Cuitlunah NCCD cun eiin bawmawknak an zem caan ah SAC ralhrang thawn a tuantlangtu, ralthuam kaitu pawl thawn pehtlaihnak neitu, Mipi ralkap pawl thawn pehpar aw mi pawl bawmnak pe lo in raltlan menmen mipi pawl lawng an bawm thu a sim bet.
Anih cun “SAC ralhrang pawl in fang thiar an kham tik ah mipi pawl eiin sinfen hrang harsatnak an tong. Chin ramkulh sungah cun fang phurh ding lawng siloin fanglei dinghman a harsa. Bial loo an siatsuah sak mi loo hnatuantu pawl, Fang khumnak fang inn pawl SAC ralhrang pawl ih nawh sak mi a tam ruangah a tuvek ih fang a harnak a si. Fang kan zem caan khal ah then khat khua cu hlan lai vek in an mah minung rori in an ra phur. Budget dinhmun ruangah Raltlan zaten hman kan zem thei lo. Lehhnu khal ah a dang raltlan pawl kilkip in bawm thei vivo dingin kan zuam ding” tiah Chin Kyi in an ton mi harsatnak pawl a simfiang.
Fur caan thlen a nai thlang tik ah raltlan camp pawl ah a khauh khah mi Tipuan, Ti thianternak le Ti thianternak sii, siivai, puan, mikeu awhnak le nauhak pawl hrang cabu, ball pen ihzin zirnak thilri an tul sam thu theih a si.
Raltlan pawl bawm an si theinak ding hrangah ramdang ih mi zangfah theitu pawl ih peknak pawl hman a si thu le ramsung ihsin bawmnak pe duh in pehtlaihtu zohman an neih hrih lo thu Chin kyi hnenin theih a si.
NCCD pawlkom cun a liam cia kum 2022 khal ah India ram, Mizoram ih ratlan Chin mi an umnak raltlan camp 39 ah Fang, Siiti, Ci le Pe pawl ttum 2 an rak bawm thu theih a si.
