မြဝတီ khawpi kiangih Ralkap council tefarual BGF camp pakhat cu zo ti theih lo hriamkai pawlkom in an siim ih an laksak ngah

Karen ramkulh မြဝတီ khawpi ihsin peng 2 tluk hlatnak ih um Ralkap council tefarual ramri kilvengtu ralkap BGF pawlih Camp pakhat cu zo ti theih lo tualsung hriamkai pawlin mizansun July 22 simlam nazi 4 hrawngah khan an siim ih BGF camp an lak sak ngah tiah Karen hriamkai pawl hnen ihsin theih a si. Himi BGF Camp hi ပွင့်လင်းအေးမြိုင် sakhan tiih mi tamsawn theihmi a si, a sungah BGF ralkap 7 hrawng an um, zo ti theih lo tualsung hriamkai mipum 40 lai in an va siim ih ren lo baksak in an kah ciamco tiin an sim.

Cui’ BGF camp lak doawknak ahcun BGF sungtel pakhat a hmun rori ah a thi, mi 2 an nunglai in an kai ngah, a dang mi 4 pawl cu an tlanthluh thei ih hriamtuar le mithi dang an um bet maw timi cu kan thei nawn lo. An doawknak ah hin BGF lam an tuar zet, an ralthuam meithal 4 khal tualsung hriamkai pawl in an laksak ngah tiin Karen hriamkai thuthang hram cun an sim.

Tawngfang an kahawk hnu ah Raldo bawm dingin BGF pawl cu hmundang ihsin an ra thleng cih ih meithal pawl an kap nasa, hmunram ih um Ralkap council pawl khalin zan nazi 8 tiang lai rori hriamhreipi in doawknak kiangkap tluan cu nasa zetin an kap ciamco tiah theih a si.