Ralkap motor 21 in Ralkap mipum 300 lai phur ih hmunram nawr dingin ra pawksuaktu Kawl ralkap pawl cu mizansun July 25 zanlam nazi 5 hrawngah tualsung hriamkai Mobye PDF in an rak do ih khat lam khat lam kahawknak nasa zet a suk. Kawl ralkap lam ihsin mi 10 hnakih mallo an thih thu Mobye PDF cun thusuah an tuah.

Hi Kawl ralkap pawl rak dotu tualsung hriamkai pawl cu Mobye PDF battalion 1, battalion 2, Loikaw PDf le URF tipawl ṭangrual an siih an lam ihsin sungtel pakhat in hriamhma bese tuk lemlo a ngah thu an tarlang. An doawk sung hi nazi 3 hrawng an rei ih Kawl ralkap lam cun hriamhreipi nasa tukih an hman ruangah khawsung innpawl an siat, raltlanpawl beunak Phungki tlawnginn ṭhenkhat khal ah hriamhreipi an tlapuak tiah theih a si.

Kawl ralkap pawlin nasa tukih hriamhreipi an kahnak ihsin raltlan mipa pakhat le nunau pakhat hriam an tuar ih mipa sawn cu a hmun rori ah a thi cih. Doawknak ah Kawl ralkap pawl cun mipi umnak le Raltlan pawl beunak hmun hmuibat in an kah hrimmi a si thu Mobye PDF cun theihternak an nei. Kawl ralkap pawl cun Mobye khawpi sungah ṭanhmun khuar thei dingin tui’thla zarh 3nak ihsin an rak zuam rero zo tiah KNDF khalin theihternak an nei.

ဝါရီဆူးပလိုင်၊နန်းမယ်ခုံ၊ ကျွန်းတော၊ဒေါကမီး၊ ပူဖား le ဒေါငံခါး tipawl ih doawknak ah bawmnak awlsam tei’ an peksuah theinak ding hrang tumtah in Mobye khawpi ih hrambun an tumnak a si thu khal tualsung ralbuai lam zingzawitu pawl hnen ihsin theih a si. Cuvek dinhmun asi ruangah July 18 ihsi thawk in Mobye khawpi sung ah ṭanhmun khuar tum ih ra luttu Kawl ralkap pawl cu Mobye PDF le an ṭuanpi tualsung hriamkai pawl thawn an rak do reronak a si.