Mizoram, Saiha district, Tuipan khua ih raltlan camp ah March ni 16 ihsin lailak fimzirnak suakthuan tlawng an on thu theih a si.
Hi tlawng onnak cu Matupi peng Fimzirnak board pawl le Matupi Chin Refugee Community pawl kaihruainak thawn an tuah mi a si. Tuipan khua raltlan camp ih suakthuan tlawngah Kg ihsin Grade 10 tiang a um ih, tlawngta 79 lenglo le zirhtu minung 7 an um tiah Matupi fimzirnak board pawl hnen in theih a si.
Matupi fimzirnak board pawl cun Mizoram sungih Aizawl, Lunglei, Lawngtlai le Saiha district 4 sungih raltlan camp pawl ah tlawng 40 lenglo an ong ih, tlawngta 1000 lenglo tlawng an kai tiah an sim.
Cuvek thotho in Chin ramkulh, Matupi pengsung khal ah tlawng 100 lenglo an ongih tlawngta 9000 lenglo an um thu theih a si. Tufang dinhmun ah tlawngta pawl hrang tlawng ih hman dingmi thilri pawl an tlaksam hleiah tlawng inn pawl hrang tulsam mi tampi a um lai tiah theih a si.