Mizoram, Saiha District, Ainak khaw kiang, motor khal tu pakhat tel in minung 3 thahawknak thawn pehpar in, CDF-Mindat thawn hnamhnoih aw mipawl ih kut a si tiih thu hla lengvak um cu CDF-Mindat in pehparawknak kan nei lo ih, thu hla cipciar in thu kan suah leh ding tiah an sim.
Kan dung March ni 19 ni ah nunau pakhat le mipa pahnih thah an tuar tiin theih a si ih, an ruak pawl cu March ni 23 lawngah hnahcang hnah thawn an khuh mi hmuh a si tiah central Young Lai Association (CYLA) hotu hlun in a sim.
Hi thahawknak thuthawn peh par in social media par lam ah CDF-Mindat pawl ih kut in an thi tiih thu hla lengvak a um ruangah CDF-Mindat cun an mai kut a si lo thu an sim salnak a si.
“Social media par ih thu lengvak a um vek in CDF Mindat pawl ih thah an si lo. Cuisin Saiha ih sumtuah pawl thawn pehtlaihnak nei aw mi မြိုင် PDF pawl khal kan be zo. Kan mah thawn pehparawknak kan nei lo timi an mah thawn thu hla fumfe in kan suah lai ding” tiah CDF Mindat ih spoke Person in a sim.
Social Media par ih puhawknak an neih mipawl le a thi tu minung pahnih khal pehparawknak zianghman kan nei lo. ramri an thlennak ni 4 lai a rei zo. Hi thil thelng mi ah thu dik a suah theinak ding hrang CDF Mindat khal in thei tawk in a zuam ding tiah a sim bet.
“Hi thuthawn pehpar in kan nih lam ahcun tuantlang dingin kan man cia. Thu le hla felfai ten thei lo ih social media ih rak thlah hi cu zatlang a ti buai ter. Mizoram ih a thlengtu raltlan pawl hrang ah khal thil tha lo a thleng thei” tiah Mizoram ih thlengtu raltlan pakhat in a sim.
Social media par ih thu hla lengvak mi mipa pahnih le မြိုင် PDF pawl cu ziangtin an karlak ah pehtlaihawknak an nei tii cu theih felfai a si lo.
