Myanmar ramsung SAC ralhrang pawl in thuneihnak an lak hnu in Mizoram sungih beunak hawl tu Myanmar raltlan pawl cu leitlun somdawl awknak pawlkom a si mi Adventist Development and Relief Agency in bawmnak an pek ding thu theih a si.
Hi thuthawn pehpar in Champhai DC zungah mani sun March ni 21 zinglam nazi 11ah Myanmar raltlan pawl somdawlawknak hrang khawkhannak ‘Protection and Humanitarian Assistance to new arrivals from Myanmar in Mizoram 2023’ cu Adventist Development and Relief Agency pawlkom le Champhai District Level Committee on Myanmar Refugees ih tuanvo neitu pawl in ruahrel khawmnak an nei tiah Mizoram acozah ih tuanvoneitu pawl in thu an suah.
Adventist Development and Relief Agency cu Mizoram thlanglam district 4 sungah raltlan bawmawknak a liam cia mi kum ihsin an rak thok zo ih, tuikum khal ah cui district 4 hleiah Champhai le Aizawl sungih um mi Myanmar raltlan pawl bawmawknak neih thok a si thlang ding tiah an sim.
Hi hnatuannak ah raltlan pawl hrang eiin bawmawknak le nitin tual sampi pawl bawmawknak, hardamnak lam hlawmawknak, Nauhak tlawngkai hrihruai pawl an tul sam mi bawmawknak le Children Friendly Space pawl tuah ding a si ih hi hnatuannak cu thla 12 a rei ding thu theih a si.
Hi lairelnak sungih Mizoram acozah ih Myanmar raltlan pawl an hminsinnak vek asile 2023 March ni 20 tiangah Champhai district sung khua 47 ah Myanmar raltlan zaten 10226 um in, mipa 3033, nunau 3264 le nauhak 3929 an um thu theih a si. Raltlan camp 34 um mi sungin camp 13 pawl cu 2021 ih rak sak zo mi si in, camp 21 pawl cu 2022 kum ih sak mi an si.
Myanmar ramsung ihsin raltlan tu minung 2643 pawl cu raltlan camp ah um in, minung 7583 pawl cu raltlan camp lenglam ih an um thu theih a si.
Champhai district sung raltlan pawl ih thu le hla zaten hminsinnak neih theh zo a si ih, cumi sungin 9488 pawl hnenah raltlan card (Temporary ID) pawl suah sak an si zo, a tang lai mi 738 pawl hrang khal tawlrel sak rero lai a si tiah theih a si.Mizoram acozah cun ramkulh sung huap in Myanmar raltlan minung thawng 30 lenglo an um tiah thu an suah.
Adventist Development and Relief Agency cu leitlun killi ih um mi, bawmnak tla sam mipawl hrang fimthiamnak, eiin hawlawknak, hardamnak, poipeng caan tundinawknak, humhimnak tipawl zanghleicawi ih tauntu an si ih an hmunpi cu American ram, Maryland ah a um.
Indai ramsung ah 1992 in an hram bun aw ih, tu ahcun leitlun ram 138 ah darh aw in zatlang bawmawknak le somdawlawknak hna an tuan tiah theih a si.
