Aliam cia mi ni 5 sungah India paisa Rs. 2.3 Million man rittheih sii thawn Mizoram sungih an kaih mi, minung 11 sungah Myanmar mi minung 3 an tel thu March ni 28 ah India palik pawl in an sim.
Kan dung tlawngkai ni 4 ihsin thok in Aizawl le Sachek district kiang kap sungin hmun 7 ah ritheih sii sum tuah pawl an hawl ih 913.8 garam rit mi no. 4 cu Mizoram rittheih sii kham tu tuanvoneitu pawl in an kai tiah an sim.
Sachek district sungih rittheih sii donak ih an hawlnak ah No.4 gram 434 thawn tualsung mi minung 7 an kai ih, Aizawl district sung khal ah No. 4 gram 346 thawn Myanmar ramsung mi minung 3 tel in minung 4 kan kai tiah tuanvoneitu pawl in an sim.
An kaih ngah mi Myanmar ramsung mi minung 3 thuthawn pehpar in an thu hla cipciar cu zianghman theih a si hrih lo. an kaih mipawl cu riitheih sii le thinlung thlengdanglam ter thei mi daan thawn thu buai tuah sak an si tiah thuneitu pawl ih an sim thu India hrambun mi Outlook thuthangah an tarlang.
