Zangfahnak dil rero cingin Democracy cansuahnak hrang cangvaitu mi 4 pawl Ralkap in an thlai that thothomi parah ASEAN chairman cun nasa zetin a dem, Ralkap council parih a beidawn zet thu sim

Min Aung Hlaing cu a thiltuahmi rapthlak taktak pawl ruangah amah ṭan zettu ASEAN Chairman Cambodia Prime Minister Hunsen rori hman in nasa zetih a dem thu le a beidawn thu a ṭawngsuak ve thlang. Zahngainak nei dingih dil rero cingin Democracy cansuahnak hrang cangvaitu mi 4 an vun khai that thotho mi hi cu ASEAN cun nasa zetin a dem ih hivek Thihdan pekawknak cu Myanmar ralkap council lak ah kan bei a dawng cuarco thlang a si tiin ASEAN chairman cun thusuah a tuah.

Tui’ dinhmun ah Myanmar ram thubuai zet lai asi ih hivek thil a thleng betbet hi cu tuhnak ih nasa sinsin buainak khal hmuh le tawn peh vivo hrih ding a si thu, ASEAN dinhmun in hi dinhmun khirhkhan zet hi ṭha zetih kaihruai thei dingin thinsau cio dingah siseh buainak nasa sinsin ih suah dingmi pawl hrial dingin fawrhfialnak a neih thu, a ṭum 55nak ASEAN ramleng tlanbawi pawl tawnkhawm lairelnak neih hlan ah Democracy cansuahnak hrangih sual rerotu pawl Thihdaan pekawknak cu nasa zetih dem an si thu le Khai that an si mi ruangah ASEAN ih zuamnak pawl dung a tawlhter tlun ah ASEAN thuthlung tuahmi pawl khal tuahsuak an tum lo a si timi a langter asi tiin ASEAN hotu cun a sim.

ASEAN cun Myanmar ram mipi siseh ramthukhel pawlkom siseh tlangpar miphun hriamkai pawl siseh zapi te ih tel theimi remdaih thurelkhawmnak nei dingin an fawrh rero lai ah Democracy rampi dinsuahnak ding hrangih sual rerotu mi 4 rori Ralkap council in an khai that hi cu ASEAN khal an bei a dawng rori si ko. Leitlunpi dinhmun khalah tufang hi Myanmar ralkap council cu thubuai hmasuan rero lai a si na cingin hivek an tuah rumro ngam mi hi duhsannak cu an nei rori ko ding tiah zum a si.

Min Aung Hlaing ih kaihhruai Ralkap council in dothlengnak tuahtu mi 4 an khai thatmi parah dokalhnak langter in leitlun ramdang dang ih thleng Myanmar mi pawl cun duhphawr lamzawhnak an nei hai.

Cumi sungin Thailand ram hi mipi pungkhawm aw an ra suak tam nasa ih mi tampi cu an Lu ah NLD puante Sen ṭawn in tuisun July 26 sun ah Thailand ram Myanmar Embassy hmai ah an ra suakkhawm. Thailand cozah dinhmun in Myanmar ralkap council hi pehtlai ih dinpi nawn lo dingin Bangkok khawpi Myanmar Embassy hmai ah mipi suakkhawm cun dilngennak an nei.

Thailand ram ih thleng Myanmar mipi cun Thai cozah hnen ah dilngennak an neihmi pawl cu official in Cakuat nak khal an nei tiah theih a si. Myanmar mipi pawlih auaw pawl theihsak dingin le leitlunpi khalin telpi cio dingah duhpawrhnak ih an hotu cun thucah simnak khal a nei. Tuisun Thailand ram ih duhphawrhnak an neihmi hi Bangkok khawpi sung lawngah siloin hmun dang khalah an tuah ve tiin an sim. Thailand cozah apposition party lam khalin Myanmar ram democracy cansuahnak dingih sual rerotu pawl Thihdan an pekmi thu ah Thai cozah in Myanmar ralkap council dem ih mawhthluk ve dingin fawrfialnak an nei.