Mi ukbettu pawlih hmunsuamnak hi kan mai’ san rori ah kan cemter thluh ding asi tiah KNLA hotusang cun a sim

Miphun U kan si timi lungput bawrhhlawh le Thuneihnak duh ṭekṭek pawl ruangah siseh san khat hnu san khat kan tuar rero mi hmuhsuamnak le rekbet awknak pawl, milai canpual buainak pawl hi kan mai’ san rori ah ṭhiatbal thluh in kan cemter ding asi tiah mizansun October 6 sun ih thlengmi Dawei People Liberation Force kum 1 kim lâwmnak khawmpi ah Karen miphun ralkap KNLA ih an hotubik sangtu Lt. General စောဘောကျော်ဟဲ cun a sim.

Kan ralpawl thawn hmaisan ih doawknak kan tuah rero lai ah harsatnak le retheihnak pawl kan tawng ding timi cu hrial theih lo a siih rekbetawknak, hmuhsuak awknak le ukbetnak pawl doneh theinak dingah zuamnak, thinsaunak, tuar theinak ṭanrualnak tipawl a ṭul vekin tualsung mipi siseh ram mipi zaten kan mai’ covo ngahsalnak hrang ral kan do lai ah khat le khat theihthiam awk le ṭuantlangnak pawl khal a ṭul asi tiin KNLA hotu cun a sim peh.

Kan nih ram mipi cun kan covo siseh mahte ukawknak, mai’ hmailam thu mahte rorel theinak tipawl ngah theinak dingah ral kan do rero a siih kan tumtah mi zaten kan ngah lai hlanlo kan tumtah mi zoh phah in kan do peh vivo a ṭul. Rampi in zalennak pumhlum a ngah lai hlan lo luangrual zetin kan Ral kan dotlang kei uh ttiah KNLA hotubik sangtu Lt. General စောဘောကျော်ဟဲ cun thucah ropi zet a cah hai.