Thuneihnak latu midepde MAH in National Unity Government (NUG), People Defense Force (PDF) le tlangpar hriam kai pawl cu an hram in kan cimit ding tiah March ni 27 ih thlengmi ralhrang ralkap ni ah a sim ih, thuneihnak an lak peh ihsin hivek in an au kio zo mi a si ih, khuinah hman humhual thei mi an nei lo timi cu zapi theih cia mi a si tiah Karen National Union (KNU) spoke person ပဒိုစောတောနီး in a sim.
March ni 27 ih a thlengmi SAC ralhrang pawl ih ralkap ni a thlen hlan ni pawl ah Kareni ramsungah SAC ralhrang minung 90 lenglo an thi ih, ralthuam phunkim 40 lenglo khal Kareni tangrual ralkap pawl in an lak sak mipawl tel in doawknak sungah SAC ralhrang thi le hlo, tam hman sehla mi depde MAH cun NUG, PDF le a bawmtu tlangpar hriam kai thenkhat pawl an hram in kan cimit ding tiah puar thau nawn in a sim. Cuvek ih a sim mi thawn pehpar in Karen media pawl in KNU spoke person ပဒိုစောတောနီး tonsuhnak an neih mi ah a tuvek ih a let mi a si.
SAC ralhrang pawl ih an suah mi ralkap uknak hmun pawl kan zoh asile ralhrang pawl in an humhual thei nawn lo mipawl kan hmuh ding. KNU humhual mi ramsungih ကြားအင်းဆိပ်ကြီး၊ ကော့ကရိတ် pawl tel in pengpi 3 lawng ralkap uknak an phun nan hmun dang pawl khal ah ralhrang pawl in an humhual thein awn lo tiah ပဒိုစောတောနီး in a sim.
“ngaingai te cun khuinah hmun khal an humhual thei mi an nei nawn lo a fiang tuk ko” tiah ပဒိုစောတောနီး in a sim. SAC ralhrang pawl in thuneihnak an lak hnu doawknak vei 8000 lenglo kan nei zo tiah a sim bet. Cuitlunah ralhrang pawl cun rapthlak tak ih mi an hremnak ah lamzin phunphun an hman tiah ပဒိုစောတောနီး in ralhrang pawl ih rapthlak zia a phorh suak.
“Asinan a rah suak mi cu an tum mi thawn a linglet aw. Mipi pawl in an tih lo hleiah an mah dokalhnak thazang an nei tha sinsin. A nih cun an hram in kan citmit ding timi thuneihnak an lak pek ihsin a au rero zo mi a si. Tu hi thuneihnak an lak kum hnih a kim zo. Asinan mah le mah khawmawknak tuah tupawl an tha a dor lo ih an thazang, cak sinsin ding lawng a tang” tiah ပဒိုစောတောနီး in a sim.
Cuitlunah SAC ralhrang hotu MAH timi pa cu thli bawm pakhat tluk asi ruangah a tong suak mi tongkam pawl ngaingai ih ruah a tlak lo tiah ပဒိုစောတောနီး in a sim. “Anih khal a mai duh mi lawnglawng a tuah vivo men. Remdaihnak timi cu kaa lawnglawng ih sal rero men a ngah lo tiah ပဒိုစောတောနီး in a sim.
“ngaingai ih thil kan tuah ding tik ah khat le khat rinsan awknak kan neih a tul. Khat le khat zum ngam awknak a um lo. kan ramsungah tik cu caan a neih mi hmuahhmuah in mipi pawl hrem in a that tupawl thawn ziang ti zawng khal in kan rinsan aw ngam lo ding. Tiam kamawknak neih mi khal vei khat te hman a tuah suak lo tu cu, ziangti lam khal in zum ngamawk a tha lo. tuini tui caan ah ziangti zawng khal in a cang thei lo mi a si” tiah ပဒိုစောတောနီး in a sim.
KNU pawl ih policy cu a fiang felfai thu, ralhrang lam in ziangtik hman ah ramkhel thu ih rolh awk salnak ding an neih lo thu, hlan ih kan thu ken vek in kan feh vivo ding tiah ပဒိုစောတောနီး in a sim.