Chin ramkulh, Matupi peng, ထယ်ဘွေး camp ih eiin phruh aw dingih fehtu SAC ramri nor tupawl cu March ni 20 ihsin Matupi in motor 3, ralhrang thanzang 80 rual thawn an suak ih March ni 23 zinglamah CDF Matupi in karlak in an rap ih ralhrang 6 thi in, hmai nor thei nawn lo dung an sip. SAC ralhrang pawl cun vanzam ziangtik caan khal ih an hman thei ruangah mipi pawl fimkhur dingin CDF matupi in theih ternak an tuah.
March ni 22 ihsin kaphnih doawknak a suah vek in tuizing khal ah himi lamzain ah doawknak a suak ih SAC ralhrang pawl in ralthuampi an tawngpa khah vek in vanzam an hman thei ruangah mipi pawl a himnak hmun ih tthaw aw dingin le relhnak ding leikhur lai dingah an fial tiin CDF Matupi spoke person Nai John Kim in a sim.
Tui SAC ralhrang pawl thawn an doawknak zintlun ih တွီရှစ် khua၊ ဝလံပီး khua, ကလား khua၊ ဝလံတဲ khua, လေဆင်း khua pawl ih tualsung mipawl cu khawsungah an um lai tiah a sim.
Anih cun “Matupi-paletwa lamzinpi par ah khaw 5 a um. Inn cun 500 hrawng an si ding. Asinan then khat pawl cu a himnak hmun ah an thleng theh zo. A hrek khat hrawng an tang lai. An mah an him ding a thu pi. Ralhrang pawl cu vanzam an hman asile khawsung khal an ren zik lo. Mipi le ral khal, thlei dang cuanglo ih an kah ahcun ziangtin hman kham awk a theih lo. Curuangah van ral khamawk theinak ding hrang theihternak kan pek mi a si” tiah a sim.
Tui thla March ni 20 ihsin Matupi ralhrang pawl hrambunnak ခလရ (304) in Matupi-Paletwa lamzin kap ih um ထယ်ဘွေး ralhrang camp ah eiin le ralthuam phurh aw dingin ralhrang thazang minung 80 hrawng, motor 3 thawn an feh mi a si. SAC ralhrang pawl an fehnak matupi-Paletwa lamzin peng 12 ih တွီးရှစ် khawsuah kiangah CDF Matupi in karlak ih an rak donak ni 3 hrawng a rei zo.
“Matupi-Paletwa lamzinpi par ih ထယ်ဘွေး camp hrang eiin phurh aw dingin motor 3, ralhrang minung 80 hrawng thawn Matupi ihsin an suak ih peng 12 hlatnak တွီးရှစ် khaw suah, thlan mual tlang pawng le ပန်တွီး lamzin pengah 2023, March ni 23 zinglam 6:50 in nazi 8:00 tiang doawknak a suak. ralhrang lam ihsin minung 6 thi in, mitampi in hriam an ngah. Mipi ralkap lam in ziang hriam hma ngah um lo ten dung an sip sal” tiah an thu suah sungah an tarlang.
Zaanlam nazi 2 le nazi 3 karalak ah SAC ralhrang lam ihsin an mah bawmtu ding ralhrnag 30 an thleng bet ih doawknak sungih hriam hma ngahtu ralhrang pawl cu Helicopter thawn an thiar aw tiah an sim. Hi SAC ralhrang ramri nortu pawl cu CDF-Matupi pawl in karlak ih an rak donak ruangah hmai nor thei nawn lo in တွီရှစ် khua ah an kir sal.
Doawknak a sosang tuk ruangah SAC ralhrang pawl cun vanzam an hman thei ruangah nu le pa, mipi pawl a himnak hmun lam ih thawn aw dingin le relhnak ding khur timlam aw cia dingin CDF Matupi in mipi theih ternak an tuah. Tufang ah SAC ralhrang pawl cu hmai nor bet thei lo in khawsungah an um lai tiah theih a a si.
CHRO pawl ih an thusuah mi vek a sile 2023 kum, January le February thla 2 sung lawngah SAC ralhrang pawl in vanzam thawn Bomb mu 140 lenglo thla in, ttum 53 Chinram ah bomb an thlak tiah an tarlang.
