Chin ramkulh, Matupi-Paletwa lamzinpi par ထယ်ဘွေး ralhrang camp ih eiin thilri phurh aw tum mi SAC ralhrang motor 3 pawl cu do an tuar lala ih SAC ralhrang minung 13 an thih lala tiah CDF Matupi ih tuanvoneitu pakhat in a sim.
Matupi hrambun mi ခမရ (304) hralhrang hmun ihsin a suak tu SAC ralharng minung 80 hrawng thlun aw mi, ralhrang motor tlar pawl cu Matupi-Paletwa lamzipi par ah CDF le CNA pawl in karlak ihsin an rak do mi a si.
“bomb dirhpuaknak, kahawknak a um ih ralhrang lam in minung 13 thi in, hriam hma ngah 7 an um. Kan mah CDF Matupi lam in pakhat in hriam a ngah” tiah CDF-Matupi ih tuanvoneitu in People’s Spring hnenah a sim.
March ni 24 khal ah Matupi-Paletwa lamzin ban 14/15 karlak ah bomb dirh puah a si ih SAC ralhrang minung 7 an thi tiah CDF Matupi in thu an suah. Cumi ihsin lamzin karlak ah ralhrang pawl vei 3 an rak do ih ralhrang minung 6 thi in 7 in hriam hma an ngah tiah an tarlang.
CDF Matupi ih an thu suah mi sungah March ni 24 Matupi-Paletwa lamzin ban 15 ah bomb dirh puahnak, lamzin ban 12/13 karlak ih an doawknak videos pawl khal an tarlang. Cuihleiah van ihsin an zuk mi sung khal ah ralhrang pawl ih ruak ti teptep in a darh aw mipawl khal hmuh ding a um.
“tu cu doawknak a um vivo lai ding. SAC ralhrang motor pawl neh dingin kan do. Harsatnak cu a um ko. A cang theitawk in khamaw phah in kan do” tiah CDF Matupi ih tuanvoneitu in a sim.
Matupi-Paletwa lamzin ban 16 ဝါပုန်း lamzin kel tluan ah SAC ralhrnag pawl in pal bomb an phum tiah Matupi CDF in theih ternak an nei ih, bomb thianfainak an tuah hnu lawngah mipi pawl lamzin hmang dingin forhfialnak an nei. Cuitlunah CDF Matupi ih thusuah mipawl cu rak ngai cang ringring ding khal in theihternak an tuah.
Cui ralhrang motor pathum cu March ni 22 khal ah Matupi-Paletwa lamzin bang 12 တွီရှစ် khaw suah le ပန်တွီးလ်း lamzin pial ah Matupi CDF in an rak do ih SAC ralhrang lam in minung 6 an thi. Cui doawknak sungah ralhrang minun 30 an bet aw ih hriam hma ngahtu pawl cu Helicopter thawn an thiar aw tiah CDF in thu an suah.
“Thalpau ah ralhrang pawl cun eiin le ralthuam an phurh aw theu. An nih pawl cu ralkap thangzang le eiin an phurhawk lonak a rei tuk thlang. Tuikum ahcun tui ttum hi a veikhatnak a si. Hakha an hmunpi siseh, Chinram tlanglam Mindat-Matupi lam ah siseh ralhrang pawl a burbur in an kai so. An nih pawl cu tuikum January thla thok ihsin vanzam thawn tuini tiang mi an do. Kan mah pawl cimit in tum. Asinan Vanzam ih an mih kahnak pawl ah kan nih Chinram ahcun tlangram um tu dan thawn hmun dang pawl vek in hmual a nei ngaingai lo. Thi le hlo kan nih lam ahcun a mal tuk. Cuvek in a um. Kan thei tawk in kan do vivo ding” tiah CNF/CAN ih spoke person Salai Htet Ni in Peoples Spring media thawn tonsuhnak an neih ttum ah a sim.
