India ram, Manipur ramkulh ih Myanmar ralttlan pawl a langte an um theinak dingah raltlan card suahsak an si ih an umnak ding inn khal an tuah sak ding tiah Burma Refugee Committee Kabaw Valley(BRCK) hnen in theih a si.
March ni 26 zinglam, More peng sung khaw pakhat ah Manipur ramkulh acozah pawl ih thu an rel catnak vek in Myanmar raltlan pawl buaipitu Committee hotu Minister Let Pau Haukip, zung hnatuan tupawl le raltlan pawl thawn ton khawm awknak an neih mi ah a tuvek ih an sim mi a si.
“Khawsungih um darh zelzel mipawl hmunkhat te ah Camp pakhat vek in inn kan sak sak ding. Eiin, hardamnak, fimzirnak le kilhimnak lam khal thei tawk in kan bawm ding tiah Minister ih a rel thu” BRCK hotu Tamu Amyotha hluttaw palai U Thang sii in a sim.
Minister cun raltlan pawl hrang inn sak sak ding thuthawn pehpar in ramkulh acozah in sumpai an bawm ding ti a si nan bi khiah a um ding ruanah raltlan camp tha deuh ih sak a si theinak dingah raltlan pawl hrang mah rori tel in, bawm cio dingah sawmnak a nei tiah a sim. Cuitlunah Minister a thlun tu thuneitu pawl in raltlan camp an sak sak ding hlei ah meisa, hardamnak, fimzirnak le raltlan pawl ih kilhimnak pawl khal thei tawk ih tuanvo an lak sak ding thu theih a si.
Raltlan camp sungih um tupawl hrang a langte um theinak card suahsak an si ih, ramleng mi thu buai ih kaih khihawknak ihsin an zalen thlang ding ti a si nan mahte thu ih camp leng ih um tu pawl kaih khih an tong pang asile tuanvo an ak sak lo ding tiah Minister thawn tonkhawmnak ah an rel.
Hi tonkhawmawknak ah Burma Refugee Committee Kabaw Valley (BRCK) pu bik U Thang sii, Hotu Dr. Myo, Nunau le nauak lam hrang tuanvolatu Dr. Soe le Myanmar raltlan pawl in an telpi.
Hi tonawknak an neih ttum ah U Thang sii khal in mipi dothelngnak an neh hlan sung a langte um theinak an suah sak ding a beisei thu, um lan tanak ding hrang siloin dothelngnak a hlawhtlin ve ten mai khua le ram ih an kir ding thu a sim.
