Sagaing ramthen, Lairawn Kalay khawpi ih Phungki tlawng hotu pungki pakhat cu ralhrang
pawl thawn hnatuan tlang in an pekmi Pistol meithal zun 1 a ken ruangah August ni 10, sunhnu
nazi 2 hrawngah Kalay PDF le tangrual ralkap pawl in an kai ih, thu tiamkamnak hmin sign ter
in an thlah sal tiah August ni 26 ah Kalay khawtlang mipi kaihruaitu pawl in thu an suah.
Kaih khih tuartu hi Dunuai khua Phungki tlawng ih um Ung Tuh Nan Dah a si ih August ni 9
sun ah Lairawn Kalay khawpi sung, Mah bah tah pawl in ciahnehmi Maha Tan Da Yung
Phungki tlawngah SAC ralhrang hotu pawl thawn meeting an nei ih, Dunuai lam ih a tlunnak
Kalay-Gangaw lamzin hmun pakhat ah Kalay mipi palik (thlanglam), PDF-Kalay battalion 5 le
khawsung PAP pawl in an kaih mi a si.
“Ung Tuh Nan Dah ih to mi motor sungah khawsung ihsin an rak phurh phah mi phungki 3 le
nunau pakhat an tel. Annih pawl cu zianghman kan tuah lo ih kan thlah sal. Ung Tuh Nan Dah
cu thusuhnak nei dingin rei lo te kan ko” tiah Lairawn Kalay mipi palik Major Aung Kyi in a sim.
Phungki tlawng uktu Ung Tuk Nan Dah thusuhnak an tuah mi ah Maha Tan da Yung
tlawngah feh in ralhrang ralkap pawl thawn tonawk thu, a liam cia ni 4 hrawng khal ah Dunuai
khua ih U Win Maung, U Zaw Lwein, U Bu Win pawl thawn Angteng kiang Kabani lilawn ih tanhmun khuartu ralhrang Major thawn an tongaw ih, ralhrang tlawng pawl ong dingin le NUG acozah tlawng pawl khar dingin thoron a pek thu, a mai hnen ihsin point 22 phun pistol meithal zun 1 a kolmi pawl a dik tiah a rel suak.
Ung Tuh Nan Dah cu Ni hnih sung thusuhnak an neih hnu August ni 12 ah thu tiamkamnak 4 a simi, ralhrang pawl thawn pehtlaih aw nawn lo ding, a neih mi meithal mipi ralkap pawl hnen ih
Ap ding, Dunuai khua ihsin a leng a suak ding asile tualsung mipi ralkap pawl hnenah theih ternak neih hmaisa hnu lawng in feh ding, himi tiamkamnak pawl a thlun lo asile hremnak pek a si ding timi thu pawl sign (hmin khen) ter in kan thlah sal tiah Palik Major Aung Kyi in a sim.
Cuihleiah an kaih lai ih an lon mi Ung tuh Nan Dah ih phone le Laptop pawl cu an zoh sak ih,
cumi sungah tlawnginn pawl cu PDF pawl ih bomb an puah mi asi thu, cuvek ih an tuahnak san
cu NLD pawl ih forhfialnak ruangah a si thu, PDF pawl cu Taliban pawl hnak ih a sual sawn mi
pawlkom an si thu tivek pawl, NUG acozah le mipi ralkap pawl dokalh ih, ralhrang pawl a dinpi
mi hminsinnak pawl hmuh a si tiah an sim.
Cuitlunah ralhrang palik pawl thawn an tuantlangnak thla zuk pawl, mipi ralkap pawl
hminsinnak thla zuk pawl, pehtlaihnak cet line hmin pawl kan hmu tiah Palik Major Aung Kyi in
a sim.