Kutkai pengah KIA le Kawl ralkap karlak sunvu te rorin doawknak a suak ih Ralkap lam hriamhreipi kahmi ruangah nauhak pakhat a thi

Shan ramkulh saklam Kutkai peng လွိုင်ဆမ်ဆစ် tlang hram kiangkap tluan ah Kachin miphun ralkap KIA le Kawl ralkap pawl cu mizansun July 25 kha zingpit te ihsin an doaw thawkih zanlam khawthim zawng tiang rori sunve te rori kahawknak a sosang. Kawl ralkap pawl cu Leipar doawknak ih ral an sun ṭheu ruangah ralhmai khal nawr ngam loin hriamhrei pi nasa zetin an kap ciamco, hivekih an hriamhreipi kahmi ruangah kum 3 mi nauhak pakhat an kap ngah ih hriamtuar in sizung an fehpi nan sizung ah a nunnak a cem.

Kawl ralkap pawlih hriamhreipi kahmi cu hmunsung rori ah a tla puak ih cutin inntek tei’ naute hriamhreipi cerek in a ngah ih a hriamhma a bese zet, sizung an thlenpi hnu ah a thi. Bomb puah le hriamhreipi puak awn pawl a natsat tuk ruangah Nu cun a fate pawm in a relhpi. Vanduai thlak zetin Ralkap pawlih kahmi hriamhreipi cu an relhnak kiangte ah a tla puak ih cutin hivek dinhmun an thlennak asi.

Mizansun ih Kawl ralkap le KIA doawknak cu a rapthlak ve nasa, KIA lam hi Battalion 39 pawl an siih mizan zan hnupi tiang hriamhreipi in an kap aw ur-o rero lai, doawknak kiangkap ih um tualsung mipi pawl cu mah le khua ciar suahsan in an relh thluh. Tufang an doawknak hmun hi Muse le Kutkai karlak zinpi kap asi vekin himi lamzin zawh ih khuatlawng veivak pawl khal ralring tei’ veivak cio dingah Kutkai khawsung mipawl cun ralrin pek theihternak an nei.