ကင်းမွန်းခြုံ khaw kiang doawknak ah PDF Kalay in Kawl ralkap 15 kap that

Sagaing ramṭhen Chinram Kalay peng ကင်းမွန်းခြုံ khua ni suahnak lam ဘုရားတောင်ကုန်း kiangah Kawl ralkap le tualsung hriamkai ṭangrual pawl cu tihnisun July 21 kha sunvu te deuh thaw rori kahawknak a suak ih Kawl ralkap lam ihsin mi 15 an thih thu PDF Kalay cun thuthannak an nei. Sun ni hlawhte an doawknak ah Ralkap lam mi 15 an thih lawng siloin hriamtuar khal an tam zet, tuaslung hriamkai ṭangrual lam cun Bomb in siseh meithal in siseh nasa zetih an rak donak ihsin ralkap lam mithi le hriamtuar an tamnak a si.

Kawl ralkap pawl hi kan dung July 18 ihsi khan mipum 100 hnakih tam cun Kalay le Kalaywa karlak ကျောက္ကာ khua ihsin မြစ်သာ tan in ni suahnak lam pan in hmunram an rak nawr vivo mi a si. Cui’ hmunram nawrtu Kawl ralkap pawl cu tualsung hriamkai pawl cun zingpit nazi 8 ihsin ဘုရားတောင်ကုန်း kiangah an rak kap thawkih sunvu deuh thaw rori nasa zetin an kapawk thu PDF Kalay cun an tarlang.

An doawknak hmun pawl cu မြစ်သာ tivapi ni tlaknak lam ကံပုလဲ khua ihsi khalin Kawl rlakap pawl cun hriamhreipi thawn doawknak an rak bawm ih nasa zetin an rak kap. Simlam nazi 4 hrawngah Kawl ralkap pawl cun ကင်းမွန်းခြုံ khaw inn inn 7 an urkang tiah theih a si. Cuhnu zan nazi 9 hrawngah Kalay khawpi ni suahnak lam ih ပြင်သာ khua ihsin doawknak ih hriamtuar le mithi Ralkap pawl ih ruang cu Lawng in an ra thiar ih ကင်းမွန်းခြုံ ihsin Kalay khawpi lam pan in an thiar tiah PDF kalay cun an tarlang.

Doawknak hmunram ah Kawl ralkap pawlin bomb an kam ta mi cu PDF Kalay sungtel pakhat in a pal ngah pangih hriamhma a ngah. A Ke khat lam ah hriamhma a tuar, tuhi tuamhlawm theihnak hmun ah thiar dingin sungtel pawl an ra, a thisen a suak tamtuk pang ding ti cu kan phang zet tiah PDF Kalay sungtel pakhat cun a sim. Himi July 21 sun, sun ni hlawhte ကင်းမွန်းခြုံ khaw kiang doawknak ah hin tualsung hriamkai lam ihsin PDF Kalay battalion 1,2,6,7, Local Defense Force Kalay, CNDF Vakok, CDF KKG le RKDF tipawl an ṭangrual tiah theih a si.