Ralkap Motor rual KIA pawlin an rak do ih Ralkap Motor 2 an kap ziam thluh, mithi le hriamtuar tam

Shan ramkulh saklam သိန္နီ peng နမ့်စလပ် khaw lante ah လားရှိုး khawpi lam ihsin ကွမ်းလုံ lam pan in Ralkap thazang tamzet phur ih ra feh Ralkap motor pawl cu mizansun October 6 zanlam nazi 5 hrawngah khan KIA pawlin an rak do ih Ralkap motor 2 an kang vutvo, an puak darh thluh tiah theih a si. Ralkap motor pawl hi an zaten 38 rori an si, hmunram nawr in ralkap thazang bēt dingih an ra feh rero lai lamzin hmun remnak ihsin KIA pawl cun bawhthup in an rak do mi a si thu tualsung thuthang hram cun a sim.

Ralkap motor pawl hi ṭhenkhat cu ei-in thilri phur an siih ṭhenkhat cu Ralkap pawl an phur, ṭhenkhat cu Ralthuam hriamhrei pawl an phur, နမ့်စလပ် khaw lante an thlen fangah KIA pawlin an rak do ih Ralkap motor 2 cu an alh khu vutvo, an kangziam thluh a si ko, a sungih to ralkap khal mithi le hriamtuar an tam, himi motor 2 hi Ralkap thazang phur veve an si tiah tualsung mi cun a sim peh.

Kawl ralkap pawl khal cun an motor kangsiat cu zin lai ah tan in KIA pawl an cu hi kap ve ih khat lam khat lam nasa zetin kahawknak nazi 1 sung lenglo a suak tiah theih a si. Hmunram um tualsung thuthang hram cun Kawl ralkap lam mithi le hriamtuar an tamzet tiin an sim nan thuthang hram kan laknak Kachin ramsung le Shakhan ramkulh thuthang pawl tarlang ṭheutu 7News cun a hranten nemhnget nak an neih lo thu an tarlang.

Mizansun October 6 kha zinglam khalah မန်တုံ khawpi ah KIA le PDF ṭangrual le Kawl ralkap karlak nasa zetin kahawknak a suak ih khawpi sung hrambun Kawl rlakap battalion 130 pawl cun hlaral ihsin hriamhreipi thawn nasa tukih an rak kah bawm, hivekin hriamhreipi an kah ciamco ruangah khawsung in ziang maw zat an siat tiah theih a si.