Sagaing ramṭhen Khin U peng မြင်းဒေါင်း​​ khaw tlawnginn hmai ih tualsung hriamkai pawlin Ke pal bomb an kammi cu mizansun July 24 zingpit nazi 7 hrawng ah khan bomb thianfai dingih ra Kawl ralkap bur khat pawl cun an palpuak ih Ralkap 6 an thih thu tualsung hriamkai Brother Of Lands Defense Force hriamkai pawlkom cun thusuah an tuah.

Tlawnginn hmai ih Bomb rak kamtu tualsung hriamkai pawl cu BLDF, BOB, Hero Army Khin U le an ṭuanpi pawl an si thu an thusuah ahcun an tarang. Hi thil thlennak hmun hi Yi U le Khin U hlehka awknak zinpi parah a siih Ke pal bomb, raldonak bomb tipawl in a rak puah ngah, Bomb ih puah thatmi ralkap mithi ruak pawl cu hmun dang ihsin Ralkap mipum 30 rual in an ra thiar tiah KSO cun an sim.

Kan dung July 22 zanlam ah khan မြင်းဒေါင်း khaw kiangah hmunram nawr ih cangvai Kawl ralkap pawl cu Khin U Local Defense Force ih hohanak thawn KSO pawlkom ih sungtel ṭangrual pawl cun Ke pal bomb, raldonak bomb le hri dirh bomb tipawl hmangin an rak do ih Kawl ralkap 48 rori an thih thu KURDAF cun thusuah an rak tuah dah zo.