▪︎ralhrang pawl zatek 20, a tangmi zatek 20 cu zohman ih humhual lo mi ram a si
▪︎ tangrual ralkap pawl ih humhual mi ramsungah siizung 7, tlawng 400 lenglo, Palik zung 9 le Zirsang tlawng 5 on a si
Kareni (Kaya) ramkulh ih zatek 60 ram cu Kareni mipi rakap pawl in an humhual thei zo thu Kareni phunpi humhimtu ralkap KNDF hotu, Kareni ramkulh Zatlang kaihruainak Council hotu ဒုဥက္ကဌ ခွန်းဘီ in a sim.
Humhual mi ramsungah siizung 7, tlawng inn 400 lenglo, palik zung 9 le zirsang tlawng 5 on a si zo tiah March ni 29 ih an tuah mi ramri project le Kareni dothelngnak ziang tiang a thleng zo timi relkhawmnak an neih mi ih a sim mi a si.
“Ramkhel thu ah thupi 3 a famkim a tul. Pakhatnak ah ramri a nei ding. Cun mipi a tul. Ramri nei si in mipi an um lo a sile ramkhel timi in sullam a nei lo. cun ziangha kan tuah sak thei timi par ah a tthum aw” tiah KNDF hotu in a simfiang.
Anih cun “Kareni ramih ramkhel thu ziang tiang a thleng ti asile ဖယ်ခုံ peng tel in ramsung ih zatek 60 tiang kan humhual theh zo. Himi sungah khawte pawl khal a tel. khawpi pakhat ihsin peng 5,6 tiang kan humhual. Kan dung a liam cia thla khat hrawng ahcun Loikaw khawpi ihsin peng 6 hlatnak ကုန်းသာ khua ah doawknak a suak. SAC ralhrang lam in tampi an thi. An battalion cammander tiang tu ah thawng inn ah a to lai. A mai hruai mipawl in ramri an nor thein awn lo raungah tin thu hla lengvak a um” tiah a sim bet.
SAC ralhrang pawl ih an humhual mi ram cu zatek 20 hrawng lawng a um ih a hleice in Loikhaw, Phekhung le Bawlakhe peng lawng a si tiah ခွန်းဘီထူး in a sim.
“SAC ralhrang pawl cu khawpi sung lawng. Khawpi sung kan ti tik ah khawpi sung kan va do asile khawpi tampi a siat ding. A tu DMS, Phuso khawpi pawl ah doawknak a suak ruangah khawsung khawsung a siat theh zik thlang. Cu mi kan tan hrih ruangah SAC cun ralkilnak pawl tuah in khawpi an luah. Zatek 20 hrawng cu an humhual ding. Cuisin a tanglai mi zatek 29 hi cu raldonak hmun ram pawl a si. Zo hman um a theih lo. zo khal in an humhual ve cuang lo. kan feh khal asi le bomb kamnak ram le doawknak hmun pawl a si” tiah a nih cun a simfiang.
SAC ralhrang pawl cun Kareni ram ah a mai humhual mi ramsung zatek 20 sungah siizung 3, palik zung 3 le tlnawg 20 an ong theih ih, phunsang tlawng an on thei lo tiah theih a si.
Cuvek thotho in KNDF ih huamhual mi ramsung ramkulh ih minung thawng 300 pawl an um ih, SAC ralhrang pawl ih humhual mi ramsungah minung thawng 50 hrawng lawng an um ruangah minung a let 6 hrawng in an thlau aw.
“himi ih ka sum duh mi cu kan mah in ram kan humhual thei ruangah siah lak, daan lo in hna kan tuan a si lo. Curuangah ramkhel timi khuinah hmun nan thleng ti in sut asile kan kut sungah a um. Mipi pawl a tha thei bik in kan tuam hlawm dingih thuneihnak latu pawl thei tawk in kan dawi suak bet. SAC ralhrang pawl ih huamhual mi zatek 20 khal tu hnak in kan nor bet thei asile mipi pawl ih kan duh bik mi Democracy le tlangpar mipawl ih kan beisei mahte lairel theinak kan ngah ding” tiah KNDF hotu in a sim.
SAC ralhrang pawl ih thuneihnak an lakh nu 2021 May thla ah Kareni (Kaya) ramkulh ah dothelngnak ralthuam kan kai thok ih kum hnih sungah doawknak vei 600 a suak zo. Tufangah Kareni ramkulh hi rallam ah hmunsang zet kan thelng zo ih, SAC ralhrang pawl cun minung thazang nasa tak hmangin (Human Wave) ramri an nor thu KNDF ralbawi sangtu မာဝီ in a sim.
SAC ralhrang pawl cun a tlangpi in Kareni ramkulh sungah ralhrang 2000 an ret mi ihsin kan dung naite ah minung 1200 an bet aw. February thla cem le March thla thok lam ramri an nornak ah ralhrang 2000 lenglo an bet aw tiah KNDF hotu in a sim. Curaungah tufang ah Kareni ramkulh sungah ralrang thazang minung 5200 hrawng a hman tinak a si.
Cuitlunah SAC ralhrang lam ihsin a thi an tam tuk ruangah Shan-Kaya ramri ah Taungkyi hrambun ni Myanmar nisuah ramthan ralhrang hmunpi ihsin ralhrang bawmtu dingah motor 40 hnak ih mal lo March ni 28 ihsin an bet awk thu tualsung thuthang hram pawl in an sim.
Kareni ramkulh cu SAC ralhrang pawl ih hmun an khuar biknak Nyipidaw khawpi cu duhtawk ih hrotheinak le ralrelnak dingih hmun tha an neih ruangah SAC ralhrang pawl cun humhual thei dingin nasa tak ih ramri an nornak a si.