Shanram tlanglam le Kareni ram sung ramri nor ih luttu SAC ralhrang pawl cu mipi ralkap (PDF) le tangrual ralkap pawl in an rak do ih SAC ralhrang lam in thi le hlo an tam tiah NUG acozah humhimnak zungin thu an suah.
SAC ralhrang pawl ih Brigade (66) hnuai batallion pawl, no. 7 Operation command hnuai battalion pawl, Nisuahnak lam ralkap hmunpi hnuai ih battalion pawl cun thazang tampi thawn ramri an nor raungah, Kareni Army, Kareni PDF, adang tualsung PDF pawl in March ni 8 ihsin ni 12 tiang kap hnih an doawk mi a si.
Himi doawknak ni 5 sungah SAC ralhrang lam in a langte battalion commander tel in ralhrang 88 an thi in, 10 lenglo in thi le hnai thawn hriam an tuar thu, ralkaih mi 6 an nei ih, ralhrang lam neih mi ralthuampi, meithla, cerek, ralthuam thliri phunphun an lak sak thei thu theih a si.
Hi doawknak cu ဖယ်ခုံ peng, ခေါင်းအိ le ရွှေပြည်အေး khaw kiang, ဖရူဆို peng, မူဆို khawkiang, ပင်လောင်း peng, လုံးပြင် khua le တောင်မဲသင်း khua, ပင်ပုံ khua, ဖယ်ခုံ peng nisuahnak lam ဆင်ဖြူ khaw kiang, ဖယ်ခုံ peng, လွယ်ပေါ tlang, ဖယ်ခုံ peng nisuahnak lam pawl ah an si.
Doawknak sungah SAC ralhrang pawl lam in PNO pawl ih an dopi mi then khat a um tiah an tarlang.
March ni 11 Phekhung nisuahnak lam Sinphyo khua, nisuahnak lam doawknak ah SAC ralhrang lam ihsin ခမရ (423) battalion ihsin alangte battalion commander Lin Lin Tun tel in ralhrang minung 29 an thi ih, ralthuam phun 11 le ralthuam thilri dang tel in, ral kaih mi 5 pawl cu an ralthuam ret in an pumpe aw tiah thu an suah.
လွယ်ပေါ tlang SAC ralhrang hmun khuarnak camp an donak khal ah ralhrang lam in minung 20 thi in SAC ralhrang pawl in raldonak Helicopter pahnih thawn a ra kah bawm tiah theih a si.
March ni 11 khal ah SAC ralhrang pawl cu ပင်လောင်း peng, နမ်းနိန် khua cu luh cilh in mipi pawl ih inn an nawk kang tiah NUG in an tarlang. နမ်းနိန် khua ih luh cilh tu ralhrang pawl cu ral a kian mi phungki 3 tel in nunau pakhat, khawsung mi minung 22 pawl cu a bur ih an thah thu Kareni pawl le ပအိုဝ်း pawlkom pawl in သက်သေ pawl thawn an tarlang.
SAC ralhrang pawl in Kareni ram lam ramri an nor tam vivo ruangah doawknak a suak vivo thei thu Kareni rallam thuthang suahtu ih spoke person ခူညေးရယ် in a sim.
“kan nih hmuh dan ahcun a liam cia mi March ni 16 ah ralhrang hotu sang Soe Win khal Luankhaw a feh. An nih cun kan mah Kareni ram an mah do khalh theinak ram a si ruangah ပအိုဝ်း pawl thawn hua aw dingin in tuah. Miphun le sakhuanak khal in tlengdanawknak an tuah. Kan ralbawi hotu sang khal in ca a ngan. Kan ral pawl cun an hna an tuan ih kan nih khal in kan hna kan tuan ve. Ramri nor ih an rat asile kan nih khal kan kham awknak ah kan rak do ve ding. Cutin ka sim duh” tiah ခူညေးရယ် in a sim.